تۇركيادا قازاقستان تاۋەلسىزدىگىنە ارنالعان جيىن ءوتتى
انكارادا بولعان جيىنعا تۇركيا رەسپۋبليكاسىنىڭ بۇرىنعى پرەزيدەنتى ابدۋللاح گۇل، پرەزيدەنتتىڭ باس كەڭەسشىسى يالچىن توپچۋ، ۇلى بىرلىك پارتياسىنىڭ ءتوراعاسى مۇستافا دەستيدجي، تۇركيا ماجىلىسىندەگى قازاقستان-تۇركيا دوستىق توبىنىڭ ءتوراعاسى، دەپۋتات حالىك يپەك، تۇركيا ءماجىلىسىنىڭ بۇرىنعى ءتوراعاسى حيكمەت چەتين، بۇرىنعى مادەنيەت ءمينيسترى نامىك كەمال زەيبەك، تۇرىك كەڭەسىنىڭ بۇرىنعى باس حاتشىسى حاليل اكىندجى قاتىستى.
جيىندا تۇركيا مەن قازاقستاننىڭ ديپلوماتيالىق قاتىناستارىنىڭ 25 جىلدىعىنا ارنالعان فيلم كورسەتىلدى. كونفەرەنسيادا بايانداما جاساعان قازاقستاننىڭ تۇركياداعى وكىلەتتى جانە توتەنشە ەلشىسى ابزال ساپاربەك ۇلى قازاقستاننىڭ ەكونوميكالىق-ساۋدا، حالىقارالىق ديپلوماتيا سالالارىنداعى جەتىستىكتەرى جونىندە ايتتى.
تۇركيا پرەزيدەنتىنىڭ باس كەڭەسشىسى يالچىن توپچۋ دا «ءبىر اتا-بابانىڭ بالالارى رەتىندە قازىرگە بىرلىك پەن تىرلىگىمىزدىڭ جالعاسۋىن تىلەيمىز» دەدى. تۇركيا ءماجىلىسىنىڭ تۇركيا- قازاقستان دوستىق توبىنىڭ ءتوراعاسى حالۋك يپەك تە «بىزدەن بۇرىنعى اعالارىمىز ارمانداپ كەتكەن كۇندەردى ءبىز كوردىك. سول كۇندەردى باستان كەشتىك. باۋىرلاستارمەن قايتا قاۋىشتىق. ءبىز باقىتتى جاندارمىز» دەدى.
كەلەسى ءسوز كەزەگىن العان ت ر بۇرىنعى پرەزيدەنتى ابدۋللاح گۇل تۇرىك رەسپۋبليكالارىنىڭ تاۋەلسىزدىك العان كەزدەرىندەگى ماعىنالى ەستەلىكتەرىمەن ءبولىستى.
«ءالى كۇنگە باۋىرلاس ەلدەرگە بارساق، «ءبىزدىڭ تاۋەلسىزدىگىمىزدى ءبىرىنشى بولىپ مويىنداعان تۇركيا» دەپ باستايدى سوزدەرىن. بۇل ءبىز ءۇشىن ۇلكەن ابىروي» دەگەن گۇل «تۇركيا رەتىندە وسى باۋىرلاس ەلدەردىڭ تاۋەلسىزدىگىنە تولىق دايىن بولماساق تا، تۇرىكتىك ساناسىمەن جەتىلگەن تۇلعالارىمىز بار ەدى. ولار تۋىسقان حالىقتارعا ءبىرىنشى بولىپ بارىپ، قىزمەت ەتتى» دەدى ول.
تۇركيانىڭ بۇرىنعى پرەزيدەنتى قازاقستاندى تاۋەلسىزدىگىن العان رەسپۋبليكالار اراسىندا ەرەكشە ورىنعا يە ەكەنىن ايتىپ، قازاقستاننىڭ كەمەڭگەر كوسباسشىسى نازاربايەۆتىڭ ەرەن ەڭبەكتەرىن اتاپ ءوتتى.
«الدىمەن رەسەي جانە قىتاي سەكىلدى ۇلكەن دەرجاۆالارمەن كورشىلەس قازاقستاننىڭ شەكاراسىن تۇتاستاي قىپ ساقتاپ قالۋى - ۇلكەن جاۋاپكەرشىلىك. ارتىنان ءوز ەركىمەن يادرولىق قارۋدان باس تارتۋى دا- ماقتارلىق قادام» دەگەن ابدۋللاح گۇل ۇشىنشىدەن ەلدەگى ەتنيكالىق بىرلىكتىڭ قايماعىن بۇزباي، قازاقتىڭ ۇلتتىق ساناسىن وياتىپ، ۇلتتىق مادەنيەتىن كەلەشەك ۇرپاققا جەتكىزۋ ماقساتىنىڭ دا ورىندالعانىن اتاپ كورسەتتى.
سونىمەن قاتار نۇرسۇلتان نازاربايەۆتىڭ ءبىلىم بەرۋگە وتە كوپ كوڭىل بولگەنىن ايتىپ، قازىرگىدەي قيىن داۋىردە مىقتى ديپلوماتيا قۇرۋدىڭ دا ماڭىزدى ەكەنىن، مۇنىڭ قازاقستاننىڭ جاقسى ورىنداپ شىققانىن ءبىلدىردى.
«نازاربايەۆتىڭ ەڭ ماڭىزدى قاسيەتى - قول جەتكىزىلگەن تابىستاردى جالعاستىرا ءبىلۋ. تىندىردىم دەپ قويماي، وسى تابىستاردىڭ جالعاسىن تاۋىپ، ۇرپاقتارعا قالدىرا ءبىلۋ» دەدى ول.
ءوزىنىڭ نۇرسۇلتان نازاربايەۆپەن تەك ەل باسشىلارى دەڭگەيىندە قاتىناسى بولماعانىن، قازاقستان باسشىسىمەن زيالى تۇلعالار رەتىندە ەرەكشە قاتىناستارى بولعانىن، جىلى سۇحباتتارى وتكەنىن، ەلدىڭ بولاشاعى، مادەنيەتى، جاستاردىڭ تاربيەسى جونىندە سويلەسىپ، تابىستى ىستەردى بولاشاقپەن قالاي ساباقتاستىراتىندارىن تالقىلاعاندارىن ەسكە الدى.
Egemen.kz