وبلىستىق ءبىلىم باسقارماسى باسپا ءسوز قىزمەتىنىڭ مالىمەتى بويىنشا، قاراشا ايىنىڭ سوڭىندا اقكول قالاسىنىڭ اسكەري-پاتريوتتىق كلۋبىنىڭ «ەدەلۆەيس» كومانداسى «اكموليادا» ەكسپەديتسياسى اياسىندا الماتى قالاسىنا اتتانعان بولاتىن. ەكسپەديتسيا سولتۇستىك تيان-شان تاۋىنا ساياحات جاساپ، بيىكتىگى 4010 مەتر اباي شىڭىنا شىقتى.
ەكسپەديتسيا «رۋحاني جاڭعىرۋ» باعدارلاماسى شەڭبەرىندە «ازيا جەلى» جوباسى بويىنشا جاساقتالدى. ونىڭ جەتەكشىسى الەكساندر كازاچەنكو بولسا، قاتىسۋشىلارى ۆيكتور شاچنيەۆ جانە «تۋريست» بالالار شىعارماشىلىق ءۇيى ستۋدياسىنىڭ تاربيەلەنۋشىسى اننا حالەزينا.
«ەكسپەديتسيا العاشقى كۇنى «مەدەۋ» مۇز ايدىنى، «شىمبۇلاق» تاۋ شاڭعىسى بازاسى، تالعار اسۋى، ساۋرىقساي شاتقالى، بوگدانوۆيچ مۇزدىعىنان ءوتىپ، تيان-شان تاۋىنىڭ سولتۇستىك-باتىس جوتاسى ارقىلى اباي شىڭىنا بەت الدى. سول كۇنى اۋا رايى جايسىز بولعاندىقتان ەكسپەديتسيا شاتىر تىگىپ، تاۋدا قونۋعا ءماجبۇر بولدى. تاڭەرتەڭ كۇننىڭ اشىلعاننىن كۇتكەن ەكسپەديتسيا ساپارىن جالعاستىرىپ، اتالمىش شىڭنىڭ باسىنا جەتتى.
وسى جەردە («اكموليادا» كوكشەتاۋ- اقكول)» دەپ جازۋمەن ەستەلىك كوك لەنتا بايلانعان قازىقتى ورناتتى»، دەپ اتاپ ءوتتى الەكساندر كازاچەنكو.
سونىمەن قاتار، ەكسپەديتسيا مۇشەلەرى الماتى قالاسىنداعى مانشۇك مامەتوۆا مەن ءاليا مولداعۇلوۆانىڭ ەسكەرتكىشتەرى جانە 28 پانفيلوۆشىلار پاركىندەگى داڭق مەموريالىنىڭ ماڭگىلىك الاۋىنا گۇل شوقتارىن قويدى. داڭقتى باتىر باۋىرجان مومىش ۇلىنىڭ ەسكەرتكىشى سياقتى وڭتۇستىك استانانىڭ تاريحي ورىندارىندا بولدى.