سەناتورلار ۇلتتىق ۇلان مەن شەكارا قىزمەتىن قارجىلاندىرۋ ماسەلەسىن كوتەردى
«ۇستىمىزدەگى جىلدىڭ قاراشاسىندا ق ر قورعانىس مينيسترلىگىندە پارلامەنت سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كوشپەلى وتىرىسى وتكەن بولاتىن. ونىڭ بارىسىندا اسكەري دوكترينا، تۇجىرىمداما، قارۋلى كۇشتەردىڭ جانە قازاقستان رەسپۋبليكاسىنىڭ باسقا اسكەري جاساقتارىنىڭ قۇرىلۋ جوسپارى مەن دامۋى تالقىلاندى. تالقىلاۋ بارىسىندا، شاراعا قاتىسۋشىلار قارۋلى كۇشتەردىڭ جانە قازاقستان رەسپۋبليكاسىنىڭ باسقا اسكەري جاساقتارى جابدىقتالۋىنىڭ ءبىرىڭعاي ءۇردىسىن دايارلاۋ كەرەكتىگىن ايتتى. زاڭنامالىق تۇرعىدا وسى سالادا سوڭعى جىلدارى كوپ ماسەلەلەر ءوز شەشىمىن تاپقانىن اتاپ ءوتۋ كەرەك. سونىڭ ىشىندە، جالپى اسكەري ازىق مولشەرى بەلگىلەنىپ، كەلەسى جىلدان باستاپ ارناۋلى باسپانالىق تولەم تەتىگى ارقىلى بارلىق اسكەري قىزمەتكەرلەردى تۇرعىن ۇيمەن قامتۋدىڭ جاڭا مودەلى ەنگىزىلەدى»، - دەپ توقتالدى سەناتور نۇرجان نۇرسيپاتوۆ.
«ءبىراق قازىرگى تاڭدا ۇلتتىق ۇلان، شەكارا قىزمەتى، ازاماتتىق قورعاۋ قىزمەتتەرى باسقا مەملەكەتتىك ورگانداردىڭ قۇرامىندا بولعاندىقتان، قارۋلى كۇشتەردىڭ قارجىلىق جۇيەسىنەن تىس قالىپ وتىر. ويتكەنى قازاقستان رەسپۋبليكاسىنىڭ قولدانىستاعى زاڭناماسىندا وسى قۇرىلىمدار باسقا اسكەري قۇرامالاردىڭ قاتارىندا بولىپ ەسەپتەلەدى، سول سەبەپتى ولاردىڭ قاجەتتىلىكتەرى جۇيەلى تۇردە قارجى جەتىسپەۋشىلىگىنە دۋشار بولىپ وتىر»، - دەيدى دەپۋتات.
وسىعان وراي قوعامدىق ءتارتىپتى كۇشەيتۋ، ۇلتتىق قاۋىپسىزدىكتى قامتاماسىز ەتۋ، تەررورلىق اكتىلەردىڭ الدىن الۋ، انىقتاۋ جانە بولدىرماۋ جۇمىسىنىڭ ءتيىمدى جۇيەسىن دامىتۋ ماقساتىندا ءتيىستى شارالار ۇسىنىلدى. بىرىنشىدەن، بيۋجەتتىك كودەكسكە ۇلتتىق ۇلان، شەكارا قىزمەتى، ازاماتتىق قورعاۋ قىزمەتتەرى قارجىلاندىرۋىنىڭ دەربەس شىعىن ءليميتىن قاراستىراتىن وزگەرتۋ مەن تولىقتىرۋلار ەنگىزۋ ەسكەرىلگەن. ەكىنشىدەن، قارۋلى كۇشتەردىڭ جانە قازاقستان رەسپۋبليكاسىنىڭ باسقا اسكەري جاساقتارىن قارجىلاندىرۋ جالپى ىشكى ءونىمىڭ 1 پايىزىنان كەم بولماۋىن زاڭنامالىق دەڭگەيدە مىندەتتەۋ ۇسىنىلدى.
«بۇل شارالار تەك قانا قارۋلى كۇشتەر ەمەس، سونىمەن بىرگە ۇلتتىق ۇلان جانە شەكارا قىزمەتىنىڭ قارجىلىق، ماتەريالدىق-تەحنيكالىق قاجەتتىلىكتەرىنىڭ كەپىلدى ورىندالۋىن قامتاماسىز ەتەدى»، - دەپ ءتۇسىندىردى ن. نۇرسيپاتوۆ.
رۋسلان عابباسوۆ