الەمدىك جەلى گۋگل ون مىڭ قىزمەتكەرىن ەكسترەميستىك كونتەنتتەردى باقىلاۋعا تارتپاق

استانا. قازاقپارات - 2018 -جىلى Google-دىڭ 10 مىڭنان اسا قىزمەتكەرى YouTube ارناسىنداعى ەكسترەميستىك باعىتتارداعى كونتەنتتەردى باقىلاۋ پروتسەسىنە تارتىلاتىن بولادى، دەپ جازادى ۆ ۆ س.

ۆيدەوسەرۆيستىڭ باسشىسى سيۋزان ۆويچيسكي Daily Telegraph گازەتىندەگى ءوزىنىڭ پاراقشاسىندا YouTube-تىڭ ادامداردى باسقارۋ، ماسقارالاۋ جانە اگرەسسياعا شاقىرۋ ءۇشىن ءجيى پايدالانىلاتىندىعى تۋرالى ايتتى.

ونىڭ سوزىنە قاراعاندا، Google كومپانياسىنا قاراستى ۆيدەوسەرۆيس وسى جىلدىڭ ماۋسىم ايىنان باستاپ ەكسترەميستىك باعىتتارداعى ۆيدەولاردى انىقتاۋ ءۇشىن ماشينالىق وقۋ تەحنولوگياسىن پايدالانۋدا. اتالعان تەحنولوگيانىڭ كومەگىمەن سايتتان جاعىمسىز 150 مىڭ روليك جويىلعان.

سونداي-اق، ماۋسىم ايىنان باستاپ 2 ميلليون ۆيدەو تەكسەرىلگەن.