بۇل تۋرالى تاشكەنتتە وتكەن «ۋزگەوينۆەست-2017» حالىقارالىق كونفەرەنسياسىندا ايتىلدى، دەپ حابارلايدى حابار 24.
ونىنشى رەت ۇيىمداستىرىلىپ وتىرعان شاراعا الەمنىڭ تۇكپىر- تۇكپىرىنەن گەولوگيالىق بارلاۋ كومپانيالارىنىڭ وكىلدەرى قاتىستى. ويتكەنى شەتەلدىك ينۆەستورلارعا بارلىق سالا بويىنشا العاش رەت وسىنداي مۇمكىندىك بەرىلىپ وتىر.
وزبەكستاندا جالپى 1931 كەن ورنى انىقتالعان. ونىڭ باسىم بولىگى تاۋەلسىزدىك جىلدارى تابىلدى. نەگىزى ونتۇستىكتەگى كورشىمىز جەراستى پايدالى قازبا بايلىعى جونىنەن الەمدەگى وندىققا ەنەدى. جەرگىلىكتى ۇكىمەتتىڭ شەشىمىنە سايكەس فورۋمدا شەتەلدىك ينۆەستورلارعا 29 كەن ورنى مەن قاتتى پايدالى قازبالارى بار دەپ بولجانعان 111 جوبا ۇسىنىلادى.
اتاپ ايتار بولساق، تىزىمدە باعالى زاتتاردان التىن مەن كۇمىس، مىس پەن قورعاسىن جانە مىرىش، سونداي- اق سيرەك كەزدەسەتىن مەتالدار مەن ۋران جانە تاعى باسقا تاۋ- كەن قازبالارى بار. وزبەكستاننىڭ جەراستى قازبا بايلىعىن يگەرۋ مەن ينۆەستيتسيالىق الەۋەتىن ارتتىرۋعا باعىتتالعان حالىقارالىق فورۋمدا شەتەلدىك گەولوگيالىق كومپانيالارعا مەملەكەت تاراپىنان جاسالاتىن جەڭىلدىكتەر مەن قۇجات تولتىرۋ ءراسىمى ءتۇسىندىرىلدى.
«ءبىز نەگىزىنەن سەرۆيستىك قىزمەت كورسەتەتىن كومپانيامىز. بارلىق قىزمەت ءتۇرىن جاسايمىز. سوندىقتان وزبەكستان نارىعىنا قادام باسۋعا دايىنبىز. اتاپ ايتقاندا زاماناۋي تەحنولوگيانى ەندىرۋ، بۇرعىلاۋ جۇمىستارىن جۇرگىزۋگە تولىق مۇمكىندىگىمىز بار. مۇندا گەولوگيالىق بارلاۋ جۇمىستارى قانشالىقتى دەڭگەيدە جۇرگىزىلدى، جەراستى قازبا بايلىعىنىڭ قورى قانشا جىلعا جەتەدى، ول تۋرالى بارلاۋ جۇمىستارى قاشان جۇرگىزىلگەن، جالپى گەولوگياعا كوڭىل قانشالىقتى بولىنگەن سونى ناقتىلاۋىمىز قاجەت. الداعى 5 جىلعا جاساعان جوسپارلارى قانداي سونى ءبىلۋىمىز كەرەك. سوندىقتان جۇمىس وتە كوپ بولادى دەپ ويلايمىن»، - دەدى گەولوگيالىق بارلاۋ كومپانياسىنىڭ باس ديرەكتورى قايسار قوجامۇراتوۆ.