ءولىم جاقىنداپ قالعاندا ادامعا قانداي بەلگى بەرىلەتىنى انىقتالدى

بۇل تۋرالى JAMA Internal Medicine جۋرنالىندا جاريالاندى.

ماماندار 60 جانە ودان اسقان جاسىندا قايتىس بولعان 46 مىڭ بريتانيالىقتىڭ ەلەكتروندى مەديتسينالىق جازباسىن تالدادى. اتالمىش تالداۋعا دەنساۋلىعى جاقسى ادامدار دا، جۇرەك-قان تامىرى جانە جۇيكە اۋرۋلارىنا ۇشىراعان ەگدە جاستاعى تۇلعالار دا قاتىستى.

زەرتتەۋ قورىتىندىسىنا سايكەس، جۇرەگى اۋىراتىن، قان قىسىمى جوعارى بولعان، دەمەنتسيامەن سىرقاتتاناتىن ادامداردىڭ ورتاشا ەسەپپەن 14 جىل بۇرىن قان قىسىمى كۇرت تومەندەپ كەتكەن. سونداي-اق، دەنى ساۋ بولعان ادامداردىڭ دا قان قىسىمى قايتىس بولاردىڭ الدىندا تومەندەي باستايدى.

عالىمدار گيپوتونيانىڭ (قان قىسىمى تومەندەۋ) الدىن الۋ ءۇشىن زەرتتەۋدى جالعاستىرۋدى كوزدەگەن. ولاردىڭ ايتۋىنشا، بۇل ەگدە جاستاعى ادامداردىڭ ەرتە ءولىمىنىڭ الدىن الۋعا سەپتىگىن تيگىزەدى.