ولار اتا- قونىسىنان ايرىلىپ، ءوز جەرلەرىندە بوگدە قۇرلىقتان اۋىپ كەلگەن اقتاردىڭ قىسپاعىنا الىندى. قازىر سول قاناۋشىلىقتى جۋىپ- شايۋ ماقساتىندا ۇندىستەر ۇرپاقتارىنا مەملەكەتتىك دەڭگەيدە ءتۇرلى قولداۋ شارالارى جۇرگىزىلىپ جاتقانىمەن، تۋعان جەر مەن ەركىندىكتى باستى قۇندىلىق ساناعان ۇلتتىڭ تاريحي ادىلەتسىزدىككە قاتىستى وكىنىشى ءالى كۇنگە دەيىن ساقتالعانعا ۇقسايدى. بالكىم، سول وقيعانى باسىنان وتكەرمەگەن كەيىنگى بۋىنعا تاريحي جاد ارقىلى، قان ارقىلى جەتسە كەرەك. ونى مىنا وقيعادان دا بايقاۋعا بولادى.
1960- جىلدارى ناسا ۇيىمى ايعا ۇشاتىن عارىشكەرلەرگە دايىندىق جاتتىعۋلار جۇرگىزدى. ولاردىڭ ءبىرقاتارى امەريكالىق ۇندىستەردىڭ ناۆاحو تايپاسىنىڭ اتا- قونىسى اريزونا شتاتى جەرىندە وتكىزىلگەن ەكەن. ءبىر كۇنى عارىشكەرلەردى دايىنداۋشى ءبىر توپ ازاماتتاردىڭ جانىنا سول ايماقتا قوي باعىپ جۇرگەن قارت ءۇندىس پەن ونىڭ ۇلى كەلەدى. ءوزى تەك ناۆاحو تايپاسىنىڭ تىلىندە سويلەيتىن بولعاندىقتان، اعىلشىنشا سويلەي الاتىن ۇلى ارقىلى قاريا «مىنا ۇلكەن اق كيىمدى ادامدار نە ىستەپ ءجۇر؟ » دەگەن سۇراق قويادى. عارىشكەرلەردى جاتتىقتىرۋشى توپتىڭ ءبىر مۇشەسى ايعا ۇشۋعا دايىندالىپ جاتقانىن ايتادى. قاريا عارىشكەرلەر ارقىلى ايعا حابارلاما جىبەرگىسى كەلەتىنىن جەتكىزەدى.
ناسا ۇيىمىنىڭ قىزمەتكەرلەرى مۇنىڭ جاقسى جارناما بولاتىنىن بىردەن بايقاي قويىپ، ۇلكەن كىسىنىڭ ايتقانىن ماگنيتوفونعا جازىپ الادى. ونىڭ نە ايتقانىن بالاسى اۋدارۋدان باس تارتادى. كەيىن ناسا وكىلدەرى حابارلامانى وزگە دە ۇندىستەرگە تىڭداتادى. ولار دا «اعىلشىن تىلىندەگى بالاماسىن تابۋ قيىن» دەگەن سىلتاۋمەن اۋدارماي قويادى. سوڭىندا ناسا ناۆاحو ءتىلىن زەرتتەۋشى لينگۆيست پروفەسسورمەن بايلانىسقا شىعادى. ول دا ءبىر كۇلىپ الادى دا: «قۇرمەتتى، ايداعى باۋىرلار! مىنا ادامداردى ءجىتى قاداعالاڭىزدار، ولار ءسىزدىڭ جەردى تارتىپ الۋعا كەلدى!» - دەپ اۋدارىپ بەرەدى.
Massaget.kz