ماۋلەن اشىمبايەۆ: قازاق-قىرعىز قاتىناستارىنىڭ جاڭا كەزەڭى اشىلدى
بۇل تۋرالى پارلامەنت ءماجىلىسى حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ماۋلەن اشىمبايەۆ قازاقپارات تىلشىسىنە ايتىپ بەردى.
«30- قاراشادا مينسكتە قازاقستان مەن قىرعىزستان پرەزيدەنتتەرىنىڭ كەزدەسۋى، سونىمەن قاتار وسى كەزدەسۋدىڭ قورىتىندىسى بويىنشا ەكى ەل ۇكىمەتتەرى تاراپىنان جول كارتاسىنا قول قويىلۋى قازاقستان مەن قىرعىزستان بايلانىستارىندا جاڭا كەزەڭدى اشىپ وتىر»، - دەدى ماۋلەن اشىمبايەۆ اگەنتتىككە بەرگەن سۇحباتىندا.
ونىڭ پايىمىنشا، بەلارۋس استاناسىندا ەكى ەل مەملەكەت باسشىلارى اراسىندا وتە تىعىز تالقىلاۋلار بولىپ، ونىڭ ناتيجەسىندە جەدەل تۇردە جول كارتاسىنا قول قويىلدى.
«مينسكتە قول جەتكىزىلگەن ۋاعدالىستىقتاردى، سونداي-اق جول كارتاسىندا ەسكەرىلگەن باسىمدىقتاردى جۇزەگە اسىرۋ ەكى ەل اراسىنداعى قارىم-قاتىناستاردى نىعايتۋعا مۇمكىندىك بەرەتىنى انىق»، - دەدى دەپۋتات.
ماۋلەن اشىمبايەۆتىڭ اتاپ وتۋىنشە، جول كارتاسىندا قازىرگى ماسەلەلەردى شەشۋگە ىقپال ەتەتىن وتە ماڭىزدى شارالار قاراستىرىلعان. ولار قىرعىزستان تاراپىنا ءونىمنىڭ سانيتارلىق، ۆەتەرينارلىق، فيتوسانيتارلىق باقىلاۋىن قامتاماسىز ەتۋگە بايلانىستى بولىپ وتىر. ويتكەنى بۇل تاۋارلار قازاقستان اۋماعىنا جانە ارى قاراي ەلىمىز ارقىلى ە ا ە و- نىڭ وزگە دە ەلدەرىنە تاسىمالدانادى.
«مۇنداي باقىلاۋدى كۇشەيتۋ بويىنشا ءتيىستى شارالار جول كارتاسىندا ەسكەرىلگەن، سونىمەن قاتار قىرعىزستاندا كەدەندىك ءارى سالىقتىق اكىمشىلەندىرۋدى كۇشەيتۋ شارالارى قاراستىرىلعان. بۇل قادامدار جانە ولاردى ىسكە اسىرۋ ە ا ە و اياسىندا قىرعىزستان اراسىندا قابىلدانعان بارلىق ۋاعدالاستىقتاردى قامتاماسىز ەتۋگە مۇمكىندىك بەرەدى»، - دەدى ول.
دەپۋتات ءوز سوزىندە قازاقستان مەن قىرعىزستان وتە جاقىن ەلدەر ەكەنىن، مەملەكەتتەردىڭ كوپتەگەن بىرلەسكەن ەكونوميكالىق مۇددەلەرى قالىپتاسقانىن، ال حالىقتار باۋىرلاس ەكەنىن ەسكە سالىپ ءوتتى.
«وسى ورايدا ءبىزدىڭ قارىم-قاتىناستاردى تەرەڭدەتۋ، ىنتىماقتاستىقتى نىعايتۋ قازاقستانعا دا، قىرعىزستانعا دا ءتيىمدى»، - دەدى م. اشىمبايەۆ.
ەستەرىڭىزگە سالا كەتەيىك، جاقىندا ق ر پرەمەر-ءمينيسترىنىڭ ءبىرىنشى ورىنباسارى اسقار مامين مەن قىرعىزستان پرەمەر-ءمينيسترىنىڭ ورىنباسارى تولكۋنبەك ابدىگۋلوۆ ەكىجاقتى ەكونوميكالىق ىنتىماقتاستىق تۋرالى جول كارتاسىنا قول قويدى.
جول كارتاسى شەكارا، كولىك، فيتوسانيتاريالىق جانە ۆەتەرينارلىق باقىلاۋ، كەدەندىك جانە سالىقتىق اكىمشىلەندىرۋ سالالارى بويىنشا ءوزارا قارىم-قاتىناس، سونداي-اق ەكىجاقتى ىنتىماقتاستىقتىڭ ماڭىزدى ماسەلەلەرىن شەشۋگە نەگىزدەلگەن 50 شارانى قامتيدى. قۇجاتتا تەز ارادا قولعا الىنۋى ءتيىس 16 شارا، قىسقا ۋاقىتتا جاساۋى ءتيىس 5 جانە جۇيەلى تۇردە جاسالاتىن 29 شارا ەسكەرىلگەن.
جول كارتاسىنا قول قويعان سوڭ قازاقستان مەن قىرعىزستان ە ا ە و سىرتقى شەكاراسىندا كەدەندىك، سالىقتىق، ۆەتەرينارلىق، فيتوسانيتاريالىق جانە سانيتارلىق-ەپيدەميولوگيالىق باقىلاۋ جۇرگىزۋدى قامتاماسىز ەتۋدىڭ جاڭا تاسىلدەرىنە، سونداي-اق قازاقستان-قىرعىز شەكاراسى ارقىلى ەكسپورتتىق-يمپورتتىق جانە ترانزيتتىك تاۋارلاردى ەۋرازياىق ەكونوميكالىق كوميسسيا وكىدەرىنىڭ قاتىسۋىمەن وتكىزۋگە قول جەتكىزەدى.
قىرعىز تاراپى جوعارىدا كورسەتىلگەن سالالار بويىنشا ە ا ە و تالاپتارىنا تولىقتاي ساي كەلەتىن دارەجەدە باقىلاۋ جاساۋدى موينىنا الدى.
رۋسلان عابباسوۆ