بولات باقاۋوۆ ءار ورالمان وتباسىنىڭ جاعدايىمەن تانىسۋعا ۋادە بەردى
بۇگىن وبلىستىق اكىمدىكتە وتكەن بىرىككەن القا جيىنىندا ايماق باسشىسى بيىل ارنايى اۋدانداردان اۆتوبۋستارمەن ورالمانداردى جەتكىزىپ، ءبولىم باسشىلارىمەن بىرگە كەزدەسەتىنىن ايتتى، دەپ حابارلايدى pavlodarnews.kz.
وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى قايرات نۇرماعامبەتوۆتىڭ ايتۋىنشا، بيىلعى جىلى ەرتىس وڭىرىنە كەلگەن 323 ادام ورالمان مارتەبەسىن العان. ولار پاۆلودار، اقسۋ، ەكىباستۇز قالالارىنا جانە باياناۋىل، پاۆلودار، ماي، ۋسپەن، شارباقتى، ەرتىس، لەبياجى، اقتوعاي اۋداندارىنا قونىستانعان. ونىڭ ىشىندە ەڭبەك ەتۋگە جارامدى 185 ادامنىڭ 41- ءى تۇراقتى جۇمىسپەن قامتىلعان. وزدىگىنەن تابىس تاۋىپ وتىرعاندار - 112، بالا كۇتىمىمەن وتىرعاندار - 14، جۇمىسسىزدار سانى - 18. وڭىرلىك كۆوتاعا ەنگىزىلگەن 50 وتباسىنا مەملەكەتتىك قولداۋ كورسەتىلگەن. ماسەلەن، ۋسپەن اۋدانىنا قونىستانعان ورالماندار 25-100 گەكتاردان جەر الۋعا نيەت بىلدىرگەن. دەگەنمەن ولارعا ورالمان مارتەبەسىن العاننان كەيىن عانا جەر تەلىمى جەكە مەنشىككە بەرىلەدى. ال، ازىرگە جالعا الۋعا تۋرا كەلەدى.
- بۇدان باسقا، ىشكى كوشى- قون بويىنشا وڭتۇستىك قازاقستان، ماڭعىستاۋ، جامبىل، الماتى جانە قىزىلوردا وبلىستارىنان قونىس اۋدارۋ جۇزەگە اسىرىلادى، - دەدى قايرات نۇرماعامبەتوۆ.
- جىل باسىنان بەرى كوشىپ كەلگەن 69 وتباسىنىڭ 68- ءى وڭىرلىك كۆوتاعا ەنگىزىلگەن. قونىس اۋدارۋ بويىنشا بۇگىندە ماي اۋدانى كۆوتانى يگەرمەگەن. بيىلعى جىلى جەتى شاڭىراق كەلگەن بولسا، ءبىر وتباسى اۋا رايى جاعدايىنا بايلانىستى قايتادان كەتىپ قالعان. ەكى وتباسى دا كۆوتانى توسىپ، قاراشا ايىندا كەرى قايتقان. كەلەسى جىلى قونىس اۋدارۋشىلاردى قابىلداۋ كۆوتاسى توعىز ەسە ارتادى. وبلىس اكىمى بۇل ماسەلەدە قاعازباستىلىققا جول بەرمەۋ كەرەكتىگىن جانە قونىس اۋدارماس بۇرىن قۇجاتتاردى تولىق تەكسەرىپ الۋ قاجەتتىگىن ەسكەرتتى.
- ەلباسى قۇرىلتايدا «قارسى الۋ ءۇشىن جۇرەكتىڭ جىلۋى كەرەك» دەپ ايتپادى ما ، - دەدى بولات باقاۋوۆ.
- بۇل ماسەلە وسىلاي شەشىمىن تاپقانعانعا دەيىن ولار باسقا وڭىرگە دە كوشىپ كەتەدى. ال، ءبىزدىڭ وڭىردە اۋىلدىق ايماقتاردا جۇمىس كۇشى تاپشى. كەلەسى جىلى ۋاقىت تاۋىپ، مىندەتتى تۇردە قانداي كومەك كورسەتىلگەنىن قاراپ شىعامىن. جۇمىسسىز، از قامتىلعان، قونىس اۋدارعان وتباسىلاردى جانە ورالمانداردى جۇمىسپەن قامتۋ بويىنشا جۇيەلى جۇمىس جۇرگىزۋ كەرەك».