تۇرىكمەنستاندا قازاقستان ۇنى جەتىسپەي جاتىر

مارى جانە احال وبلىستارىندا ۇن جەتىسپەۋشىلىگىمەن قاتار جوعارى سۇرىپتى ۇن باعاسى ەكى ەسە قىمباتتاپ كەتكەن.

«ورتاشا العاندا ءبىر قاپ جوعارى سۇرىپتى ۇننىڭ باعاسى 50 مانات (شامامەن 14 دوللار) بولعان، ال قازىر 100 ماناتتان جوعارى» ، - دەيدى اڭگىمەلەسۋشى.

سونداي- اق، ول ءتىپتى مۇنداي باعانىڭ وزىنە ۇن تابۋ قيىن بولىپ تۇرعانىن ايتادى.

مارىداعى دەرەككوزىنىڭ حابارلاۋىنشا، مارى مەن تۇرىكمەناباد اراسىندا ادامداردى تاسىمالدايتىن تاكسيستەر جولاۋشىلارمەن بىرگە ۇن دا تاسىپ جۇرگەندەرىن ايتۋدا.

«لاباپەدەگى كوپشىلىك تۇرعىن ۇن تاپشىلىعىن بايقاپ، ارتىق قور جيناۋدا» ، - دەيدى ايماقتاعى دەرەككوزى.

ۇن تاپشىلىعى ءتىپتى اشحابادتاعى تۇرعىندار اراسىندا دا بايقالۋدا. كۋاگەرلەردىڭ ايتۋىنشا، قازىرگى تاڭدا بارلىق «تۇرىكمەنباكالەيا» مەملەكەتتىك دۇكەندەر جەلىسىندە سىرتتان اكەلىنەتىن ۇن مۇلدە ساتىلىپ جاتقان جوق. سونداي- اق، جەرگىلىكتى جەردىڭ وندىرىسىندەگى ۇن تاپشىلىعى دا بايقالۋدا.

دەرەككوزىنىڭ ايتۋىنشا، بۇل ەلدە قازىر رەسەيلىك جانە قازاقستاندىق وندىرىستەگى ۇنعا سۇرانىس ارتقان. ونىڭ ءوزى كەيبىر جەكەمەنشىك دۇكەندەردە عانا ساتىلۋدا.

اشحابادتاعى مەملەكەتتىك دۇكەندەردىڭ قىزمەتكەرلەرى جوعارى سۇرىپتى ۇن تاپشىلىعىنا سۇرانىستىڭ كوپتىگى سەبەپ بولعانىن ايتادى.

«بىزدە ۇن ساتۋدا شەكتەۋ قويۋ تۋرالى نۇسقاۋ بولعان جوق، سول سەبەپتى ۇن قالاي كەلەدى، سول كەزدە بىردەن ساتامىز» دەيدى ولار.

Baq.kz