استانادا قازاق دراما تەاترىنىڭ عيماراتى قاشان سالىنادى
بۇل تۋرالى ق ر پارلامەنتى ماجىلىسىندە وتكەن ۇكىمەت ساعاتىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ايتتى.
«وسىدان ءبىراز جىل بۇرىن استاناداعى ق. قۋانىشبايەۆ اتىنداعى قازاق تەاترى قۇرىلىسى تۋرالى ۇكىمەتكە بەرگەن ساۋالىما وڭ جاۋاپ الىپ ەدىم. سول تەاتر ءۇيى قاشان، قاي جەردە سالىنادى؟»، - دەپ سۇراق قويدى مادەنيەت جانە سپورت مينيسترىنە ءماجىلىس دەپۋتاتى قۋانىش سۇلتانوۆ.
«جاقىندا عانا ەلباسى استانا باس جوسپارىنا بارعاندا، قۋانىشبايەۆ تەاترىنا جاڭا عيمارات سالۋ ماسەلەسى قارالعان ەدى. جاڭا عيمارات قۇرىلىسىنىڭ جۇمىسى سامۇرىق قازىنا اكسيونەرلىك قوعامىنا جۇكتەلدى. بەلگىلەنگەن جەرى العاشىندا اقوردانىڭ ارت جاعىنداعى ەتنوپارك بولاتىن. ءبىراق حالىقتىڭ كەلۋىنە ىڭعايسىزدىعى مەن اۆتوكولىكتەرگە جولدىڭ قاجەتتىلىگى ەسكەرىلىپ، باسقا جەر قاراستىرىلىپ جاتىر. استانانىڭ 20 جىلدىق مەرەكەسى شاراسىندا العاشقى قۇرىلىس كاپسۋلاسى مىندەتتى تۇردە قاعىلادى»، - دەپ جاۋاپ بەردى مينيستر.
ايتا كەتەيىك، 25 جىلدان استام تاريحى بار ەلوردالىق قاللەكي تەاترىنىڭ جاڭا عيماراتى ماسەلەسى بىرنەشە جىلدان بەرى شەشىلمەي كەلەدى.
اۆتور: ايجان سەرىكجان قىزى