قازاقستانداعى ەلشىلىكتەر جىل سايىن قايىرىمدىلىق جارمەڭكەسىن وتكىزەدى
ءداستۇرلى شاراعا قاتىسۋعا نيەت بىلدىرگەن مەملەكەتتەر ءوز ەلىندە نەمەسە ءوز قولىمەن جاسالعان زاتتاردى ساۋدالاپ، تۇسكەن قارجىنى كومەككە مۇقتاج جاندارعا ۇلەستىرەدى. ون جىلدان بەرى وتكىزىلىپ كەلە جاتقان يگى شارا بيىل دا جالعاسىن تاپتى.
جاپونيانىڭ قازاق ەلىندەگى توتەنشە جانە وكىلەتتى ەلشىسى يتيرو كاۆاباتانىڭ جۇبايى مەگۋمي بۇگىنگى شاراعا ءۇش اي دايىندالىپتى. كۇنشىعىس ەلىنەن ىدىس-اياق، كيىم-كەشەكتەر الدىرعان. جاپون حالقىنىڭ استارىنىڭ ءمازىرىن جاساعان. جارمەڭكەگە كەلەتىن جۇرتتىڭ كوڭىلىنەن شىعاتىن زاتتار ۇسىنۋدى ءجون كورگەن.
«قىركۇيەك ايىنان بەرى دايىندالدىق. سورەگە نە قويامىز، سونى ويلادىق. قازاق حالقىنا جاپون ەلىن تانىستىرۋدىڭ ءبىر شاراسى سەكىلدى عوي. ونىڭ ۇستىنە قايىرىمدىلىق جارمەڭكەسى. بۇل - ەلشى جۇبايلارى ءۇشىن ۇلكەن جاۋاپكەرشىلىك. تۇسكەن قارجىنىڭ قايدا جۇمسالاتىنىن جاقسى بىلەمىز. سول سەبەپتى بارىنشا كوپ ساۋدا جاساۋدى ويلايمىز»، - دەيدى مەگۋمي كاۆاباتا، جاپونيانىڭ توتەنشە جانە وكىلەتتى ەلشىسىنىڭ جۇبايى.
قازاقستاندا تىركەلگەن ەلشىلەردىڭ جۇبايلارى وسىدان ون جىل بۇرىن ورتاق شەشىمگە كەلىپ، جاڭا جىل قارساڭىندا قايىرىمدىلىق جارمەڭكەسىن ۇيىمداستىرۋعا ۋاعدالاسقان. شاراعا اتسالىسۋعا نيەت بىلدىرگەندەر قاتارى جىل سايىن ارتىپ كەلەدى.
مىسالى، بيىل 53 ەلشىلىك ءوز ونىمدەرىن ورتاعا قويدى. مۇندا بەلگىلى ءبىر تالاپ جوق. كەيبىر ەلشىلىكتەر وزدەرى دايىنداعان بۇيىمداردى ساۋدالايدى. كوبىنە ءوز ەلدەرىندە شىعاتىن، سۇرانىسقا يە ونىمدەردى سورەگە قويادى.
«بۇل ءوزى - شەت ەلدەردە باياعىدان كەلە جاتقان ءداستۇر. قازاقستاندا ون جىل بۇرىن تۇساۋى كەسىلدى. ەلشىلەردىڭ جۇبايلارى جۇزەگە اسىرىپ كەلە جاتقان شارا. بىلتىر ءبىر كۇندە 110 مىڭ ا ق ش دوللارىنان اساتىن قارجى ءتۇستى. ونى ەلىمىزدەگى كومەككە ءزارۋ جەتپىس ۇيىمعا ءبولىپ بەردى. جانە التايدان اتىراۋعا دەيىنگى، ارقا مەن الاتاۋعا دەيىنگى ايماقتار، بۇكىل قازاقستان تۇگەل قامتىلدى. راس، بۇكىل ماسەلەنى شەشىپ تاستامايتىن شىعار. ءبىراق يگى ءىس ەكەنى انىق قوي»، - دەدى ق ر سىرتقى ىستەر ءمينيسترىنىڭ ورىنباسارى رومان ۆاسيلەنكو.
يگى ءىس ەكەنى راس. سەبەبى كەلۋشىلەر وسىنداعى بۇيىمداردى ساتىپ الىپ، قايىرىمدىلىق شاراعا ۇلەس قوسادى. سونداي-اق مۇندا لوتورەيا ويناتىلادى. ەلشىلەر جۇبايلارى كلۋبىنىڭ پرەزيدەنتى حەبا وسماننىڭ ايتۋىنشا، جۇلدە قورى قوماقتى، قازىردىڭ وزىندە جەتى مىڭ بيلەت ساتىلىپ كەتىپتى.