تۇركيادا اسەت نايمانباي ۇلى كۇندەرى ءوتتى
دەپ حابارلايدى قازاقپارات.
29 - قاراشادا ىستانبۇل قالاسىندا وتكەن مەرەيتويلىق كەشكە قازاقستان رەسپۋبليكاسىنىڭ ىستانبۇلداعى باس كونسۋلى ەركەبۇلان ساپيەۆ، تۇركسوي حالىقارالىق ۇيىمىنداعى قازاقستان رەسپۋبليكاسىنىڭ وكىلى اسقار تۇرعانبايەۆ، ىستانبۇلداعى قازاق ءبىلىم بەرۋ جانە زەرتتەۋ قوعامىنىڭ پرەزيدەنتى سەركان دىنچتۇرك، پروفەسسور ءابدۋاقاپ قارا، قازاقستان جازۋشىلار وداعى باسقارماسى ءتوراعاسىنىڭ ءبىرىنشى ورىنباسارى، اقىن عالىم جايلىباي ءسوز سويلەدى.
30- قاراشا كۇنى تۇركيا استاناسى انكارا قالاسىندا ۇيىمداستىرىلعان مەرەيتويلىق كەشكە قازاقستان رەسپۋبليكاسىنىڭ تۇركياداعى ەلشىسى ابزال ساپاربەك ۇلى، تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ، قازاقستان جازۋشىلار وداعى باسقارماسى ءتوراعاسىنىڭ ءبىرىنشى ورىنباسارى، اقىن عالىم جايلىباي جانە ەتىمەسگۋت اۋدانىنىڭ ورىنباسارى الاددين سونات قاتىسىپ، ونەرسۇيەر تۇرىك كورەرمەندەرىنە اسەت شىعارماشىلىعىنىڭ ەكى ەل دوستىعى ءۇشىن ماڭىزى تۋرالى اڭگىمەلەپ بەردى.
ەكى قالادا دا اسەت نايمانباي ۇلىنىڭ شىعارماشىلىعى تۋرالى كونفەرەنسيادا قازاق ەلىنەن ارنايى شاقىرىلعان قوناقتار - اقىننىڭ نەمەرە ءىنىسى باقىتبەك سىزدىقوۆ «اسەت نايمانباي ۇلىنىڭ ونەر مەكتەبى»، فيلولوگيا عىلىمدارىنىڭ دوكتورى، پروفەسسور قويلىباي اسانوۆ «اسەت - تۇركى دۇنيەسىنە ورتاق تۇلعا»، اقىن سەرىك اقسۇڭقار «الاشقا اقسوراڭنان جول شىعارعان...»، فيلولولگيا عىلىمدارىنىڭ كانديداتى، دوتسەنت ءبيبىعايشا تەمىربايەۆا «اسەت شىعارماشىلىعىنىڭ ومىرشەڭدىك مۇراتى» اتتى باياندامالار جاسادى.
كونسەرتتىك باعدارلامادا قازاقستاننىڭ ەڭبەك سىڭىرگەن ءارتيسى امانتاي جۇماشيەۆ، استانا فيلورمونياسىنىڭ ءانشىسى نۇراي تانابايەۆ، كۇيشى ەرجان ارقاباي، ايتىس اقىنى بەكارىس نۇريمان سەكىلدى ونەرپازدار اسەت نايمانباي ۇلىنىڭ اندەرىن شىرقاپ تۇركيالىق قازاق دياسپوراسىنىڭ ىستىق ىقىلاسىنا بولەندى.
كەش سوڭىندا قاتىسۋشىلارعا تۇركسوي حالىقارالىق ۇيىمىنىڭ سەرتيفيكاتتارى مەن كادەسىيلارى تاراتىلىپ، اسەت نايمانباي ۇلى قورى شىعارعان مەرەكەلىك مەدال تاپسىرىلدى.