ەلباسى قالاي مەتاللۋرگ بولعانىن ەسكە الدى

استانا. قازاقپارات - كەشە استانادا «قازاقستاننىڭ 100 جاڭا ەسىمى» جوباسىنا ەنگەن جەڭىمپازدارمەن كەزدەسكەن مەملەكەت باسشىسى نۇرسۇلتان نازاربايەۆ جاس كەزىندەگى ەستەلىكتەرىمەن ءبولىستى،

دەپ حابارلايدى «قازاقپارات» ح ا ا ءتىلشىسى.

«ەندىگى كەزەكتە باسقا زامان كەلە جاتىر. مەن سىزدەردىڭ ومىرباياندارىڭىزبەن («قازاقستاننىڭ 100 جاڭا ەسىمى» جەڭىمپازدارىنىڭ - اۆت. ) تانىستىم. سىزدەر وسى قوعامدا بەلسەندى تۇردە ءومىر ءسۇرىپ جاتىرسىزدار. بارلىقتارىڭىز العا شىقتىڭىزدار. «قازاقستاننىڭ 100 جاڭا ەسىمى» - زامانىمىزدىڭ ۇزدىكتەرى رەتىندە سىزدەرمەن كەزدەسىپ وتىرمىز. بارشاڭىزدى قۇتتىقتايمىن»، - دەدى پرەزيدەنت.

نۇرسۇلتان نازاربايەۆ ءوز سوزىندە توقتاۋسىز دامۋ ۇستىندەگى قازىرگى الەمدە ءسال عانا ايالداساڭ وڭاي قالىپ قويۋعا بولاتىنىن باسا ايتتى.

«ۋاقىت سونداي. مەملەكەت مەن مەملەكەتتىڭ، ادام مەن ادامنىڭ، ۇلت پەن ۇلتتىڭ باسەكەسى جاھاندا قىزىپ تۇر. اعىسقا قارسى جۇزگەندەي، تەك قانا العا ۇمتىلۋ كەرەك. توقتاپ قالدىڭ با - اعىس سەنى قايتا كەرى الىپ كەتەدى. ومىردە دە سونداي. توقتاپ قالساڭ - بولدى. بۇگىنگى كۇنى ءبارى بالامالى اقىلمەن اينالىسىپ جاتىر. قازىرگى زاماندا داۋاسى جوق دەگەن اۋرۋلاردىڭ وزىنە ەم تابىلۋدا. جاساندى ينتەللەكت ءبارى جەردە بولادى. ءبارى وزگەرەدى. ال سانامىز وزگەرە مە؟ سوندىقتان، مەنىڭ «رۋحاني جاڭعىرۋ: بولاشاققا باعدار» اتتى ماقالامدا «كوز ىلەسپەس جىلدامدىقپەن دامىپ كەلە جاتقان الەممەن جانە دامۋشى مەملەكەتتەرمەن تەڭ بولۋ ءۇشىن ءبىز دە سانامىزدى جاڭعىرۋتىمىز قاجەت» دەدىم»، - دەپ اتاپ ءوتتى پرەزيدەنت.

ەلباسى سونىمەن بىرگە سانا جاڭعىرماسا ەشتەڭە بولمايتىنىن، بۇل ماسەلە اسىرەسە قازاقتار ءۇشىن ماڭىزدى ەكەنىن العا تارتتى.

«ءبىزدىڭ اتا- بابامىز مال باعىپ، كوشپەندى بولىپ ءوتتى. مەن جاستىق شاعىمدى ەسكە الامىن. ماماندىق بويىنشا ينجەنەر- مەتاللۋرگپىن. ءبىزدى - قازاقستاننىڭ 100 جاس جىگىتىن ۋكرايناعا جىبەردى. ءبارىمىز دە مەتاللۋرگيانى بىلمەيتىن ەدىك. ءدال جانىڭدا تەمپەراتۋراسى 1500 گرادۋستىق بالقىما مەتالل اعىپ جاتقان كەزدە، سەن ول جالىننىڭ جانىندا تۇرۋىڭ كەرەك. بۇعان قوسا اۋىر سايماندى ۇستاپ تۇرىپ، 2-3 ليتر سۋ ءىشىپ، تەرلەپ تۇراسىڭ. ءبىزدى سول سەحقا لاقتىردى دا تاستادى. سول كەزدەگى جانە بۇگىنگى مەنتاليتەتتى سالىستىرىپ كورىڭىز»، - دەيدى ەلباسى.

پرەزيدەنت سول كەزدە قازاق جىگىتتەرىنىڭ اراسىندا 10 جىگىت قانا جۇمىستا قالعانىن ەسكە الدى.

«شىدامادى. اۋىلدان كەلگەن اكە- شەشەلەرى: «سەنىڭ قۇرداستارىڭ مەكتەپ ءبىتىرىپ، ۇيلەنىپ جاتىر. قوي باعۋدا. نەعىپ ءجۇرسىڭ مۇندا»، - دەدى دە، الىپ كەتتى. ال سول ماماندىقتى مەڭگەرگەن باسقا ۇلتتىڭ ماماندارى ءبىزدى قوي باققاننان باسقا قولىنان ەشتەڭە كەلمەيدى دەدى. سول ءسوز نامىسىڭا تيمەي مە؟ سوندىقتان، «رۋحاني جاڭعىرۋ» باعدارلاماسى بويىنشا ۇلكەن شارۋالار اتقارىلىپ جاتىر. ول جۇمىس حالىقتىڭ قولداۋىنا يە بولدى»، - دەپ ءتۇيدى مەملەكەت باسشىسى.

اۆتور: ايان بەكەن ۇلى