نۇرسۇلتان نازاربايەۆتىڭ تۋعان اۋىلىندا «اتامەكەن» ورتالىعى اشىلدى - فوتو
«اتامەكەن» تاريحي- مادەني ورتالىعىندا ق ر تۇڭعىش پرەزيدەنتى - ەلباسىنىڭ قورى مەن كىتاپحاناسى، تۇڭعىش پرەزيدەنتتىڭ مۋزەيى، پرەزيدەنت ءىس باسقارماسى، ق ر ۇلتتىق كىتاپحاناسى، شامالعان اۋىلىنىڭ مەكتەپ- مۋزەيى، قاراساي اۋداندىق تاريحي ولكەتانۋ مۋزەيى بەرگەن قۇجاتتار، كىتاپتار، فوتوماتەريالدار جينالعان.
«ەلباسىنىڭ دانا باسشىلىعىنىڭ ارقاسىندا تاۋەلسىز قازاقستان شيرەك عاسىردا بىرلىگى مەن بەرەكەسى جاراسقان، ەكونوميكاسى قۋاتتى مەملەكەتكە اينالدى. وسى رەتتە «ەرىم دەيتىن ەلى بولماسا، ەلىم دەيتىن ەر قايدان بولسىن» دەگەن ءسوز ەسكە تۇسەدى. بۇگىن ەلباسىنىڭ كىندىك قانى تامعان جەردە رۋحاني جاڭعىرۋدىڭ «تۋعان جەر» باعدارلاماسىنىڭ اياسىندا تاريحي- مادەني ورتالىق اشىلدى. «اتامەكەن» كەشەنى وسكەلەڭ ۇرپاققا ونەگە بەرەر ماڭىزدى ورىن بولارى راس»، - دەدى الماتى وبلىسىنىڭ اكىمى اماندىق باتالوۆ.
شارا الماتى وبلىسىنىڭ اكىمدىگى جانە ق ر تۇڭعىش پرەزيدەنتى - ەلباسى قورىنىڭ قولداۋىمەن ۇيىمداستىرىلدى.
ورتالىق ۇيىمداستىرۋشىلارىنىڭ ماقساتى قازاقستاندىقتار اراسىندا ەلباسىنىڭ شىعارماشىلىق جانە ساياسي جولىن كەڭىنەن ناسيحاتتاۋ، سونداي- اق پرەزيدەنتتىڭ ءومىرى مەن قىزمەتىنىڭ ايشىقتى ۇلگىلەرى نەگىزىندە جاستاردىڭ پاتريوتتىق تاربيەسىن كۇشەيتۋ.
جاڭا ورتالىقتا ەكسپوناتتار ن. ءا. نازاربايەۆتىڭ ءومىرى مەن قىزمەتىنىڭ، قازاقستان رەسپۋبليكاسىنىڭ قالىپتاسۋى مەن دامۋىنىڭ نەگىزگى كەزەڭدەرىنە سايكەس حرونولوگيالىق رەتپەن ورنالاستىرىلعان. بۇل ورتالىققا كەلۋشىلەرگە قازاقستاندىق مەملەكەتتىلىكتىڭ قايتا جاڭعىرۋى پروتسەسىندەگى، ەكونوميكاداعى جانە الەۋمەتتىك سالاداعى، تاريحي دامۋداعى تۇبەگەيلى تەرەڭ وزگەرىستەردى وتكەرۋدەگى جانە قازاقستاننىڭ ⅩⅩجانە 21 - عاسىرلار شەڭبەرىندە حالىقارالىق بەدەلىنىڭ نىعايۋىنداعى ەلباسىنىڭ اۋقىمدى ۇلەسىن، ءرولى مەن ەڭبەگىن كوزبە- كوز باعالاۋ مۇمكىندىگىن تۋدىرادى.
ءبىرىنشى زالدا بولاشاق مەملەكەت باسشىسىنىڭ بالالىق جانە ءجاسوسپىرىم جىلدارىنا، ەڭبەك جولىنىڭ باستالۋىنا ارنالعان ەكسپوزيتسيا ورنالاسقان.
ەكىنشى زالدىڭ ەكسپوناتتارى ەلباسىنىڭ وداقتىق رەسپۋبليكا باسشىسى قىزمەتتەرىن اتقارعان جانە تاۋەلسىز قازاقستاننىڭ بۇكىل حالقى تۇڭعىش پرەزيدەنت ەتىپ سايلاعان كەزەڭدەرگە جاتادى.
«اتامەكەن» ورتالىعىنىڭ ءۇشىنشى زالى ەلباسىنىڭ باسشىلىعىمەن ىسكە اسىرىلعان اۋقىمدى قايتا قۇرۋلارعا، قازاقستان رەسپۋبليكاسى تاۋەلسىزدىگىنىڭ شيرەك عاسىرىنداعى دامۋ قورىتىندىلارىنا ارنالعان. سونداي- اق، مۇندا ن. ءا. نازاربايەۆتىڭ تۋعان اۋىلى شامالعانعا ءار جىلدارى بارعان ساتتەرى تۋرالى فوتوماتەريالدار دا بار.
ءتورتىنشى زالدا ەلباسىنىڭ سىرتقى ساياساتتىق قىزمەتى - استانادا وتكىزىلگەن سامميتتەر جانە «ەكسپو-2017» كورمەسىن قوسا العانداعى ءىرى حالىقارالىق شارالار، قازاقتاردىڭ بۇكىلالەمدىك قۇرىلتايى، شەتەلدەردىڭ مەملەكەت جانە ۇكىمەت باسشىلارىنىڭ رەسمي كەلگەن ساپارلارى تۋرالى ماتەريالدار ورنالاستىرىلعان.
ەلباسىنا شەتەلدىك كوشباسشىلار تارتۋ ەتكەن حاتتامالىق سىيلىقتار ۇلكەن قىزىعۋشىلىق تۋدىرادى.
«اتامەكەن» ورتالىعىندا پرەزيدەنت ەڭبەكتەرىنىڭ، سونداي- اق ءتۇرلى اۆتورلار جازعان ەلباسىنىڭ جولى تۋرالى كىتاپتاردىڭ ۇلكەن توپتاماسى جيناقتالعان.
ورتالىققا كىرەبەرىستە قازاقستان رەسپۋبليكاسى كارتاسىنىڭ اياسىندا تانىمال ءمۇسىنشى شاميل قوجاحانوۆ ورىنداعان قولا كومپوزيتسيا ورنالاستىرىلعان.
ق ر تۇڭعىش پرەزيدەنتى - ەلباسىنىڭ قورى ورتالىقتى سالتاناتتى اشۋ بارىسىندا ەرەكشە سىي - مەملەكەت باسشىسى پايدالانعان ۇكىمەتتىك اۆتوموبيلدى تارتۋ ەتتى.
ق ر تۇڭعىش پرەزيدەنتى - ەلباسى قورىنىڭ اتقارۋشى ديرەكتورى قانات جۇمابايەۆ اتالعان شاراعا قاتىستى پىكىر ءبىلدىردى.
«ءبىز بۇگىن تاريحي ءمانى بار ۇلكەن وقيعاعا كۋا بولىپ وتىرمىز. بۇل كۇن بارلىق قازاقستاندىقتار ءۇشىن ەلەۋلى كۇن، ويتكەنى ەلباسى نۇرسۇلتان ءابىش ۇلى نازاربايەۆ - قارقىندى الەۋمەتتىك- ەكونوميكالىق جانە ساياسي دامۋى بار مەملەكەتتىڭ بىرەگەي ۇلگىسىن جاساعان زامانىمىزدىڭ تانىمال مەملەكەتتىك جانە ساياسي قايراتكەرى. ەلباسى سەكىلدى تاريحي تۇلعا - ءبىزدىڭ جاستارىمىز تەڭەلۋگە تىرىسىپ، وزدەرى ءۇشىن دۇرىس باعدار بەلگىلەۋىنىڭ، ەلىكتەۋىنىڭ ايشىقتى ۇلگىسى، ال ونىڭ يدەيالارى مەن ەڭبەگىنىڭ جەمىسى حالىق يگىلىگىنە اينالۋعا ءتيىس»، - دەدى ول.
اۆتور: گۇلميرا عوسمانالي