ءدىن ءمينيسترى دەسترۋكتيۆتى ءدىني يدەولوگياعا قارسى جولدى قالىپتاستىرۋعا شاقىردى
بۇل تۋرالى قازاقستان ءدىنتانۋشىلارىنىڭ VII فورۋمىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.
فورۋم جۇمىسىنا ورتالىق مەملەكەتتىك ورگانداردىڭ باسشىلارى جانە وكىلدەرى، ق ر پارلامەنتى ءماجىلىسىنىڭ دەپۋتاتتارى، ءدىنتانۋشى- عالىمدار، ەلدەگى جوعارى وقۋ ورىندارىنداعى ءدىنتانۋ كافەدرالارىنىڭ تاجىريبەلى وقىتۋشىلارى، عىلىمي قىزمەتكەرلەر مەن ءدىني بىرلەستىكتەر جانە ۇ ە ۇ- لاردىڭ وكىلدەرى قاتىستى. شارانىڭ پلەنارلىق وتىرىسىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ زاماناۋي كەزەڭدەگى ءدىن سالاسىنداعى مەملەكەتتىك ساياساتتى جۇزەگە اسىرۋدىڭ نەگىزگى باعىتتارىنا توقتالدى.
«قوعامدا كەز كەلگەن دەسترۋكتيۆتى ءدىني يدەولوگيانى مۇلدەم قابىلداماۋدى قالىپتاستىرۋىمىز كەرەك. بۇل جەردە بىرلىك پەن جالپى ۇجىمدىق كۇش- جىگەر ماڭىزدى. ەلباسى مەن مەملەكەتتىك ساياساتتى قولداۋ تەك قانا سوزبەن ەمەس، كۇندەلىكتى مىنەز- قۇلىقتا، ءىس- ارەكەتتە، ءتىپتى سىرتقى بەينەسىندە كورىنەتىنىن ءار ازامات ءوز جاقىندارىنا، تانىستارىنا ءتۇسىندىرۋى قاجەت»، - دەپ اتاپ ءوتتى ن. ەرمەكبايەۆ.
ءمينيستردىڭ ايتۋىنشا، جەكەلەگەن ازاماتتار مەملەكەت ۇستانىمىنا قولداۋ بىلدىرە تۇرا، نورماتيۆتىك قۇقىقتىق اكتىلەردى بۇزادى.
«زاڭ تالاپتارىنا قاراماستان وزدەرىنىڭ ءدىني بىرلەستىكتەرىن تىركەۋدەن، ءدىني ۋاجدەرىمەن ەكپە ەگۋدەن، قان قۇيۋدان باس تارتادى. ينتەرنەتتەن شەتەلدىڭ راديكالدى ءدىن ۋاعىزداۋشىلارىنىڭ دارىستەرىن جۇكتەپ تاراتادى. ەلباسىمىزدىڭ قازاقستان حالقىنا جانە سالت- داستۇرلەرىنە جات سىرتقى كورىنىستەرگە جول بەرمەۋ تۋرالى ايتقاندارىنا قاراماستان، باسقا ەلدەرگە ءتان قارا كيىم كيۋ، ساقال قويۋ، قىسقا شالبار كيۋدى جالعاستىرۋدا»، - دەدى نۇرلان ەرمەكبايەۆ.
ەسكە سالا كەتەيىك، استانا قالاسىندا «قوعامدىق سانانى جاڭعىرتۋدا ءدىن سالاسىنداعى مەملەكەت ساياساتىنىڭ ءرولى» اتتى قازاقستان ءدىنتانۋشىلارىنىڭ VII فورۋمى وتۋدە. ۇيىمداستىرۋشىلاردىڭ ايتۋىنشا، اتالعان فورۋمنىڭ ماقساتى - ءدىن سالاسىنداعى مەملەكەتتىك ساياساتتى جۇزەگە اسىرۋ ءۇشىن عىلىمي جانە ساراپشىلار قاۋىمداستىعىن جانە ۇ ە ۇ- لاردىڭ وكىلدەرىن بىرلەسىپ جۇمىس ىستەۋگە شاقىرۋ.
اۆتور: ايان بەكەن ۇلى