الاكول جاعاسىندا بەس جۇلدىزدى قوناق ءۇي سالىنادى

استانا. قازاقپارات - الاكول جاعاسىندا بەس جۇلدىزدى قوناق ءۇي سالىنادى. بۇل تۋرالى شىعىس قازاقستان وبلىسىنىڭ اكىمى دانيال احمەتوۆ ايتتى، دەپ حابارلايدى «قازاقپارات» ح ا ا ءتىلشىسى.

«ءبىز وتكەن جىلى الاكولدە جۇمىستىڭ العاشقى كەزەڭىن جۇرگىزىپ، اباتتاندىرۋعا 500 ميلليون تەڭگە جۇمسادىق. الاكولگە الماتىلىقتار مەن وزگە دە وبلىستان ادامدار وڭاي جەتۋى ءۇشىن جالاڭاشكول ستانساسى مەن قابانباي اۋىلىنىڭ اراسىنداعى جولعا 1,3 ميلليارد تەڭگەنىڭ جوندەۋ جۇمىستارى جۇرگىزىلدى. كەلەسى جىلى دا بۇل باعىتتا قوماقتى قاراجات بولىنەتىن بولادى. ۇلكەن جۇمىستىڭ اتقارىلعانىنا الاكولدە دەمالعانداردىڭ وزدەرى كۋا. جۋىق ارادا ول جاققا 5 جۇلدىزدى قوناق ءۇي سالامىز»، - دەيدى و ك ق- دا وتكەن باسپا ءسوز ءماسليحاتى بارىسىندا دانيال احمەتوۆ.

سونىمەن بىرگە، ش ق و اكىمى «وسكەمەن - جالاڭاشكول»، «سەمەي - جالاڭاشكول» اراسىندا تەمىر جول سالىناتىنىن اتاپ ءوتتى. ونىڭ ايتۋىنشا، الاكولگە قىتايلىق تۋريستەردىڭ كەلۋىنە دە جايلى جاعدايلار جاسالىپ جاتىر.

«الاكولمەن قاتار، سىبە اۋماعىنداعى دەمالىس ورىندارىنا 1 ميلليارد تەڭگە ءبولىندى. بۇقتىرما سۋ قويماسىندا دا جۇمىستار قارقىندى جۇرۋدە. كەلەسى جىلى ءبىز اۆتوكولىك جولدارىنىڭ بارلىعىن جوندەۋدى اياقتايمىز. وسىلايشا، ءوڭىرىمىزدىڭ 300 مىڭ تۇرعىنى دەمالىستارىن كوڭىلدى وتكىزە الادى»، - دەيدى احمەتوۆ.