دانيال احمەتوۆ سەمەيگە وبلىس ستاتۋسىن بەرۋگە قاتىستى اڭگىمەلەرگە نۇكتە قويدى
بۇل تۋرالى ءوڭىر باسشىسى بۇگىن ورتالىق كوممۋنيكاتسيالار قىزمەتىندە وتكەن بريفينگتە ايتتى، دەپ حابارلايدى «قازاقپارات» ح ا ا ءتىلشىسى.
«بۇل ارينە، جاي ءسوز، جالپى ايتقان ءسوز. مەنىڭشە، ينتەرنەتتەگى قىسقا عانا حابارلامانى ءجيى اسىرەلەپ ايتۋعا تىرىسامىز. اتاپ ايتقاندا، بىرنەشە اقساقال سەمەي ءوڭىرىن قايتا جەكە وبلىس ەتۋ تۋرالى ءوتىنىش ءبىلدىردى. ءبىراق، ولاي ەتۋدىڭ ەشقانداي ەكونوميكالىق تيىمدىلىگى جوق»، - دەدى دانيال احمەتوۆ.
وبلىس اكىمى سونىمەن بىرگە، سەمەي شاھارىندا جۇرگىزىلىپ جاتقان جۇمىستارعا توقتالدى.
«پرەزيدەنتتىڭ تاپسىرماسىمەن سەمەي قالاسىنا اۋقىمدى تۇردە اباتتاندىرۋ جۇمىستارىن جۇرگىزىپ جاتىرمىز. بيىل ونداعى 25 شاقىرىم جولعا جوندەۋ جۇمىستارىن جۇرگىزدىك. ەگەر سوڭعى 20 جىلدا جاز ايىندا سەمەيدە ىستىق سۋ بولمادى دەسە، ءبىز بۇل ماسەلەنى شەشپەيمىز دەگەندى بىلدىرمەيدى. كەلەسى جىلدان باستاپ جازدا ىستىق سۋعا قاتىستى تۇيىتكىل بولمايتىنىنا كەپىلدىك بەرەمىن. ءبىز ەكونوميكالىق تيىمدىلىك جانە تۇسىمدىك بازا دەگەننىڭ بار ەكەنىن ءتۇسىنۋىمىز كەرەك. ءبىراق، سەمەي قالاسىن كوركەيتۋدىڭ جولىن قاراستىرىپ جاتىرمىز. ونى بۇكىل سەمەي حالقى بىلەدى. بۇل تەك قانا ىستىق سۋدىڭ ماسەلەسى عانا ەمەس، سەمەي قالاسىنىڭ اۋەجايىن دا جوندەۋدەن وتكىزىپ جاتىرمىز. وبلىس ورتالىعىنىڭ اۋەجايىندا ونداي جۇمىستار اتقارىلىپ جاتقان جوق. سوندىقتان، بىزگە شىنايى كريتەرييلەرگە كوشكەن دۇرىس سەكىلدى»، - دەپ ءتۇيدى احمەتوۆ.
اۆتور: ايان بەكەن ۇلى