زاڭ جوباسى: ۇلكەن كولەمدى ەگىستىك جەرلەرى «ءبىر قولعا» بەرىلمەيدى
«جەردى پايدالانۋ مەن قورعاۋعا مەملەكەتتىك باقىلاۋدى كۇشەيتۋ ماقساتىندا زاڭ جوباسىمەن اۋداندىق اكىمدىكتەردىڭ قۇزىرەتىنە اۋىل شارۋاشىلىعى جەرلەرىن مەملەكەتتىك باقىلاۋدى جۇرگىزۋ بويىنشا فۋنكتسيا بەرۋ قاراستىرىلىپ وتىر. اۋىل شارۋاشىلىعى جەرلەرىن ۇلكەن كولەمدە «ءبىر قولعا» بەرىلۋىن بولدىرماۋ ماقساتىندا زاڭ جوباسىندا ءار وبلىستىڭ اكىمشىلىك اۋداندارى (قالالارى) شەگىندە اۋىل شارۋاشىلىعى جەرلەرىنىڭ شەكتىك مولشەرىن بەلگىلەۋ كوزدەلگەن. بۇل رەتتە، وبلىستىڭ بىرنەشە اۋداندارىنان نەمەسە بىرنەشە وبلىستاردان الىنعان اۋىل شارۋاشىلىعى جەرلەرىنىڭ جالپى الاڭى «ءبىر قولعا» بەرىلەتىن رەسپۋبليكا بويىنشا بەلگىلەنگەن شەكتى (ەڭ جوعارعى) مولشەردەن اسپاۋى شارت. ءبىر قولعا بەرىلەتىن جەرلەردىڭ مولشەرى ماسليحاتتار مەن اتقارۋشى ورگانداردىڭ بىرلەسكەن ۇسىنىسىنىڭ نەگىزىندە ۇكىمەتپەن بەكىتىلەدى»، - دەپ اتاپ ءوتتى ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ.
ونىڭ سوزىنە قاراعاندا، ق ر ا ش م اۋىل شارۋاشىلىعى جەرلەرىنىڭ شەكتىك مولشەرىن ايقىنداۋ ءۇشىن ءتيىستى ەسەپتەۋ ادىستەمەسىن ازىرلەيدى. ادىستەمە ءاربىر ايماقتىڭ جەرگىلىكتى جاعدايى مەن ەرەكشەلىكتەرىن، ونىڭ جەر رەسۋرستارىن، كليماتتىق جاعدايىن، تۇرعىندارىنىڭ قۇرامىن، اۋىل شارۋاشىلىعى سالاسىنىڭ جۇرگىزىلۋ باعىتىن، توپىراقتىڭ ساپاسىن جانە باسقا دا فاكتورلاردى ەسكەرەتىن بولادى.