بايبەك سينگاپۋردىڭ كولىك سالاسىنداعى تاجىريبەسىن الماتىعا ەنگىزبەك
ونداي كەلىسىم الماتى قالاسى اكىمىنىڭ سينگاپۋرگە جۇمىس ساپارى بارىسىندا جاسالعان.
قالالىق اكىمدىكتىڭ حابارلاۋىنشا، الماتى دەلەگاتسياسى سينگاپۋردىڭ ىسكەر ورتاسى مەن ەكىجاقتى كەلىسىمگە قولجەتكىزگەن.
«ەكىجاقتى كەزدەسۋ اياسىندا باۋىرجان بايبەك سينگاپۋردىڭ وڭتۇستىك شىعىس اۋدانىنىڭ مەرى جانە سىرتقى ىستەر بويىنشا اعا مەملەكەتتىك مينيستر مۇحاممەد ماليك وسمانمەن جانە سينگاپۋردىڭ ساۋدا، ءوندىرىس ۇلتتىق دامۋ جونىندەگى اعا مەملەكەتتىك ءمينيسترى كو پو كۋنمەن جۇزدەستى. باۋىرجان بايبەكتىڭ ساپارىندا سينگاپۋردىڭ جەر بەتىندەگى كولىگى جونىندەگى اگەنتتىك قىزمەتىنە ەرەكشە دەن قويىلىپ، كولىك جۇيەسىن ينتەگراتسيالاۋ ماسەلەسى كەڭىنەن ءسوز بولدى»، - دەلىنگەن حابارلامادا.
ايتا كەتەيىك، بۇگىنگى كۇنى سينگاپۋردە حالىق تىعىز ورنالاسقان، سوندىقتان قوعامدىق كولىكتى دامىتۋعا جەتە ءمان بەرىلگەن. مۇندا كولىك تۇراقتارىن ازايتۋ، جولدى پايدالانعانى ءۇشىن اقى تولەۋدى ەنگىزۋ ارقىلى جەكە كولىكتەر قاتارى سيرەگەن. سينگاپۋر بيلىگى 2018 -جىلى ەسكى كولىكتەردى جويۋ باعدارلاماسىنىڭ ارقاسىندا جەكە كولىك سانىن مۇلدەم ازايتۋدى قاراستىرعان. ەسكى كولىك ءار 10 جىل سايىن جويىلادى، جاڭا اۆتوموبيل سودان كەيىن عانا تىركەلەدى.
باۋىرجان بايبەك سينگاپۋرلىقتارمەن كەزدەسۋدە الماتىدا اۋقىمدى كولىك رەفورماسى جۇزەگە اسىرىپ جاتقانىن، الداعى ۋاقىتتا سينگاپۋردىڭ كولىك سالاسىنداعى تاجىريبەسىن پايدالاناتىنىن ايتقان.
«الماتى كوشەلەرىن كۇن سايىن 700 مىڭنان استام كولىك ءجۇرىپ وتەدى، سونىڭ سالدارىنان قالا ترافيگىنە قىسىم جاسالۋدا. ءبىز قوعامدىق كولىككە ەرەكشە نازار اۋدارامىز. جىل اياعىنا دەيىن قالا اۆتوبۋس پاركىنىڭ ۇشتەن ءبىرى جاڭارادى، ج ر ك جوباسىنا دايىندىقتار جاسالۋدا، ب ر ت ءدالىزى قۇرىلادى، مەترو قۇرىلىسى جالعاسادى، اۆتوبۋستارعا ارنالعان ارنايى جولاقتار ۇزىندىعى 100 شاقىرىمعا دەيىن جەتەدى. كولىك تۇراقتارى قولعا الىنىپ، ۆەلوينفراقۇرىلىم، جاياۋ جۇرگىنشى ايماقتارى پايدا بولۋدا»، - دەدى باۋىرجان بايبەك.
سونىمەن قاتار، الماتى دەلەگاتسياسى سينگاپۋردىڭ ستراتەگيالىق جوسپارلاۋ جانە قالا قۇرىلىسىن باقىلاۋ جونىندەگى اگەنتتىگىنىڭ جۇمىس تاجىريبەسىنە جەتە ءمان بەردى.
«بۇگىنگى كۇنى ءبىز «الماتى-2020» باعدارلاماسىن جۇزەگە اسىرۋدامىز، ونىڭ باستى باعىتى ەكولوگيا، ترانسپورت رەفورماسى، دەنساۋلىق ساقتاۋ، قاۋىپسىزدىك جانە ينفراقۇرىلىمدى دامىتۋ. قالانىڭ ەكونوميكالىق الەۋەتىن ارتتىراتىن شەبەرلىك جوسپارىن دا جاسادىق. تەحنولوگيا ۇنەمى وزگەرەدى، سوندىقتان ءبىز قالا تۇرعىندارىنىڭ ءومىرىن جاقسارتاتىن جوبالاردى ەنگىزەتىن بولامىز»، - دەپ اتاپ ءوتتى اكىم.
باۋىرجان بايبەكتىڭ جۇمىس ساپارىنىڭ قورىتىندىسى بويىنشا شەتەلدىك سەرىكتەستەر ءۇشىن باعدارلامالار مەن شەشىمدەر دايىندايتىن «Singapore Cooperation Enterprisە» مەملەكەتتىك اگەنتتىك الماتىعا سمارت- تەحنولوگيانى ەنگىزۋگە، قالا قۇرىلىمىن ءتيىمدى جوسپارلاۋعا جانە شەبەرلىك جوسپارلاردى جاساۋعا كومەكتەسەتىن بولادى.
وسى رەتتە الماتىنى دامىتۋ ورتالىعى، الماتى قالاسىنىڭ ساۋلەت جانە قالا قۇرىلىسى باسقارماسى مەن «Singapore Cooperation Enterprise» اراسىندا جاسالعان ءتيىستى مەموراندۋمعا قول قويىلدى.
اۆتور: الماس مۇقاش ۇلى