ماماندار شىنايى ماحابباتتى عاشىق بولۋدان بولەك ۇعىم رەتىندە قاراستىرادى. ماحاببات وتى اقىرىن تۇتانادى، ال عاشىقتىق سەزىمى تەز كەلەدى. ادامدى شىن سۇيەتىنىڭىزدى ءبىلۋ ءۇشىن ونىڭ جان- جاقتى قىرىنان جاقسىلاپ تانۋىڭىز كەرەك. ادام ءبىر كورگەننەن اشىلىپ، ىشىندەگىسىنىڭ بارلىعىن اقتارا الماۋى مۇمكىن. ول ءۇشىن ءبىراز ۋاقىت قاجەت. عاشىقتىق قالاي تەز تۇتانسا، سولاي تەز وشە مە الدە سوڭى باياندى ماحابباتقا ۇلاسا ما - ول ۋاقىتتىڭ ەنشىسىندە. ءبىر كورگەننەن عاشىق بولۋ دەگەن ءسوز بار، ال ءبىر كورگەننەن ءسۇيىپ قالۋ دەگەن تىركەس جوق. ۇناتۋ، قۇشتارلىق، كورگىڭ كەلۋ - جەڭىل- جەلپى ءوتىپ كەتەتىن سەزىم. ولار شەكسىز، جارقىن سەزىمگە اكەلۋى مۇمكىن، ول ءۇشىن ۇزاق جولدى ءجۇرىپ ءوتۋ كەرەك.
ماحاببات وتى تەز وشپەيدى، ال عاشىقتىق بىردەن ۇشىپ كەتەدى. مۇنى ارادا ءبىراز قاشىقتىق جاتسا دا سەزىمى ءۇشىن كۇرەسىپ جۇرگەندەر راستاي الادى. تۇبىندە ماحاببات سەزىمى جاتقان قارىم- قاتىناس اياق استى ۇزىلسە، ونى ۇمىتۋ وڭايعا سوقپايدى. پسيحولوگتار جۇپ قانشا ۋاقىت بىرگە بولسا، ۇمىتۋعا دا سونشا ۋاقىت قاجەت ەكەنىن ايتادى. مىسالى بىرەۋمەن ءبىر جىل بويىنا كەزدەسىپ ءجۇرىپ، اياق استى ەكەۋى ەكى جولدى تاڭداۋى كەرەك بولعان جاعدايدا، سەزىمدەرى شىنايى بولعان بولسا، جۇرەكتەگى جارانىڭ ەمدەلۋى ءۇشىن دە ءبىر جىل قاجەت ەكەنىن ايتادى. عاشىقتىق قالاي تەز كەلسە، سولاي تەز كەتەدى. الايدا مۇندا دا «ءبىراقتار» بار. ەگەر ارادا از ۋاقىت ىشىندە وتە جاقىن قارىم- قاتىناس ورناعان بولسا، ادام سەرىكتەسىنە پسيحولوگيالىق تۇرعىدان دا، فيزيكالىق تۇرعىدان دا تاۋەلدى بولىپ قالادى. مۇندايدا ۇمىتۋ اسا وڭاي بولمايدى. تەك ءبىر ادامدى سۇيۋگە بولادى، قاتارىنان بىرنەشە ادامعا عاشىق بولۋعا بولادى. ادام كەيدە الدىندا بىرنەشە تاڭداۋ تۇرعاندا ءبىر شەشىمگە كەلە المايدى. انانىڭ كوزى ۇنايدى، مىنانىڭ ءسوزى ۇنايدى. ەكەۋىن دە جىبەرگىسى كەلمەيدى، قايسىسىن كوبىرەك ۇناتاتىنىن شەشە المايدى. بۇل عاشىقتىق دەپ قاراستىرىلادى. ال ءبىر ادامدى عانا بولاشاعىم دەپ كورسە، بۇل - ماحاببات.
ماحاببات - جاسامپاز، عاشىقتىق - قيراتۋشى سەزىم. ماحاببات ادامعا كۇش، قۋات سىيلايدى. ول تۇلعاعا شىعارماشىلىق شابىت بەرىپ، ماقساتقا جەتۋگە دەگەن تالپىنىسىن كۇشەيتەدى. ءوزىن ءوزى جەتىلدىرىپ، وقۋدا دا، جۇمىستا دا كوزدەگەنىنە جەتۋگە تىلسىم كۇش بەرىپ وتىرادى. ال عاشىقتىق تەك ويعا بەرىلۋ مەن مۇڭعا باتۋ سەزىمىن تۋعىزادى. كەز كەلگەن نارسەگە اشۋشاڭدىق ادەتىن تۋعىزىپ، ادامنىڭ ەش نارسەگە زاۋقى بولمايدى. ءوزى جاساپ العان قيال الەمىندە عانا قالىقتاپ جۇرەدى. ماحاببات كەمشىلىكتەرمەن دە ساناسادى، ال عاشىقتىق ەلەمەيدى. ماحاببات وزگە ادامنىڭ ىشكى الەمىندەگى بايلىعىن اشۋعا كومەكتەسەدى. بارلىق ادامنىڭ جاقسى جاعىمەن قاتار، جاعىمسىز قاسيەتتەرى دە بولادى. ءبىراز شىنايى ماحابباتى بار ادام ونىڭ كەمشىلىكتەرىنەن دە جاقسىلىق ىزدەيدى الدە بىرگە جەڭۋگە كۇش سالادى. عاشىقتىق كەزىندە الدىڭداعى ادامنىڭ كەمشىلىگىن كوزگە ىلمەيسىڭ. تەك جاقسى جاقتارىن كورەسىڭ. ال عاشىقتىق باسىلعان كەزدە كەمشىلىگىن بايقاسا، بىردەن باس تارتۋى دا عاجاپ ەمەس. ماحابباتقا وسەك- اياڭ اسەر ەتپەيدى، ال عاشىقتاردى بۇل ەكىگە ايىرادى. ماحاببات - ءورت سەكىلدى. جەل سوقسا باياۋ وت ءوشىپ قالادى، ال كۇشتى وت ودان سايىن لاپىلداي تۇسەدى. وتىرىك- وسەك اڭگىمەلەر شىققان كەزدە شىن سەزىمى بارلار ءبىر- بىرىنە قانشالىقتى قادىرلى ەكەنىن تەرەڭ تۇسىنە تۇسەدى، ماحابباتتارى بەرىك بولادى. ال جاي عانا عاشىق جاندار ءوز سەزىمىنەن وزگەنىڭ پىكىرىن جوعارى قويىپ، ەكى جولدى تاڭدايدى.
Massaget.kz