«قۇرمەتتى، جەرلەستەرىم، اينالايىن قىرعىز ەلىم! رۇقسات بەرسەڭىزدەر مەن بۇگىن قىرعىزستاننىڭ جاڭا پرەزيدەنتى، دوسىما اق باتامدى بەرەيىن.
و، جاراتقان، قىرعىزدىڭ جاڭا پرەزيدەنتىن قىرسىقتىڭ نالاسىنان ساقتا!
دۇشپاننىڭ زالاسىنان ساقتا!
دوس كورىنىپ، قاس بولعاننان ساقتا!
جانىڭدا ءجۇرىپ، ءوش بولعاننان ساقتا!
سوكە دوسىم، بەرەكەت جانىڭنان كەتپەسىن!
باق-داۋلەت باسىڭنان كەتپەسىن!
جورتقاندا جولىڭ بولسىن!
جولداسىڭ - قاسيەتتى قىدىر بولسىن!
جاراتقان سەنى ءاردايىم قولداسىن، امان بول، باقىتتى بولى! سوكە دوسىم، ەلىمىزگە جولىڭ اق بولسىن! اۋمين»، - دەپ الاقانىن جايىپ، بەتىن سيپاعان ەكس-پرەزيدەنتتى قىرعىز حالقى قوشەمەتپەن شىعارىپ سالدى.
ءوز كەزەگىندە انت قابىلداعان پرەزيدەنت سوورونباي جەەنبەكوۆ بۇرىنعى باسشى المازبەك اتامبايەۆقا ءيىلىپ تاعزىم ەتىپ، العىسىن ايتتى.
«المازبەك اتامبايەۆ ەلىمىزدەگى ساياسي مادەنيەتتى قالىپتاستىردى. ءسىز باستاپ بەرگەن قىرعىز كوشى ءوز جولىن جالعاستىرادى. ءسىزدىڭ اق نيەتپەن ادال ەڭبەگىڭىز، ەرلىگىڭىز، اقىلدىلىعىڭىز، كورەگەندىگىڭىز ءۇشىن ءسىز «قىرعىز رەسپۋبليكاسىنىڭ باتىرى» ەڭ جوعارعى دارەجەلى سىيلىعى «اق سۇڭقار» ءتوس بەلگىسىمەن ماراپاتتالدىڭىز. پرەزيدەنتتىك قىزمەتكە كىرىسكەننەن كەيىنگى ەڭ ءبىرىنشى جارلىعىم وسى بولادى» دەدى سوورونباي جەەنبەكوۆ.
يناۋگراتسيا سالتاناتى «الا-ارچا» مەمەلەكەتتىك رەديزەنتسياسىندا ءوتىپ، وعان 8 ميلليون 404 مىڭ 248 سوم (40 ميلليون تەڭگە جۋىق) قاراجات جۇمسالعان.
ەستەرىڭىزگە سالا كەتسەك، بۇگىن قىرعىستان رەسپۋبليكاسىنىڭ بەسىنشى پرەزيدەنتىن ۇلىقتاۋ ءراسىمى ءوتىپ، سوورونباي جەەنبەكوۆ رەسمي تۇردە مەملەكەت باسشىسى اتاندى.
ەڭبەك جولىن مەكتەپتە مۇعالىم بولىپ باستاپ ەلدىڭ پرەمەر-مينيسترلىگىنە دەيىن كوتەرىلگەن سوورونباي جەەنبەكوۆ 59 جاستا.