قازاقستاندا قانشا اتەيست بار؟
ال ءدىني دوگمالاردى ساقتاماعانى ءۇشىن ادامعا قىسىم جاسايتىندار زاڭ الدىندا جاۋاپ بەرەدى، دەپ حابارلايدى قازاقپارات ءتىلشىسى.
«بۇگىندە قازاقستان ازاماتتارىنىڭ 12 پايىزى وزدەرىن اتەيست نەمەسە اگنوستيك دەپ سانايدى. ولاردىڭ دا قۇقىقتارى قورعالۋى قاجەت. دىنگە سەنەتىن ادامدار زاڭمەن قالاي قورعالسا، دىنگە سەنبەيتىندەر ءۇشىن دە سونداي جاعداي جاسالۋى شارت. سول سەبەپتى بىرىككەن ۇلتتار ۇيىمىنىڭ ۇستانىمىنا سايكەس، ءدىن قىزمەتى مەن ءدىني بىرلەستىكتەر تۋرالى زاڭعا ءتيىستى وزگەرىستەر قاراستىرىلعان. سونىڭ ىشىندە ءدىني دوگمالاردى تولىققاندى ساقتاماعانى ءۇشىن بىرەۋگە قىسىم جاسالسا، ونداي ادامدار زاڭمەن قورعالادى. ايتپەسە، قازىرگى كەزدە ءدىني راسىمدەردى ساقتامايتىندارعا قىسىم جاساۋ ارەكەتتەرى جيىلەپ كەتتى»، - دەيدى مينيستر ەرمەكبايەۆ.
ونىڭ ايتۋىنشا، ادامنىڭ ءدىني ۇستانىمىنا قىسىم جاساۋ ارەكەتتەرى قايعىلى وقيعامەن دە اياقتالىپ جاتادى.
«ماسەلەن، وڭتۇستىك قازاقستان وبلىسىندا ەر ادام ءدىني كوزقاراسىنا بايلانىستى ءوز ايەلىن ولتىرسە، الماتى وبلىسىندا تاعى ءبىر ەركەك ايەلىن حيدجاب كيمەگەنى ءۇشىن جازالادى. مىنە، وسى ىسپەتتى وقيعالارعا جول بەرمەۋ كەرەك»، - دەپ اتاپ كورسەتتى مينيستر.
ايتا كەتەيىك، ق ر سىرتقى ىستەر مينيسترلىگىندە وتكەن باسپا ءسوز ءماسليحاتىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ەلشىلەر ءۇشىن ارنايى باسپا ءسوز ءماسليحاتىن وتكىزدى.
مينيستر ءدىني قىزمەت جانە ءدىني بىرلەستىكتەرگە ارنالعان زاڭناماعا قانداي وزگەرىستەردىڭ ەنگىزىلەتىنىن كەڭىنەن ايتىپ بەردى. ونىڭ ايتۋىنشا، مەملەكەتتىك قىزمەتشىلەردىڭ ءدىني ۇستانىمىنا قاتىستى ناقتى ءۇش شەكتەۋ بولادى. بۇدان بولەك، مينيستر ادامنىڭ بەت-الپەتىن تۇمشالايتىن كيىمدەرگە قاتىستى تۇسىنىك بەردى.
اۆتور: ارمان اسقاروۆ