قازاقستاندىق بايلار ۇزاتىلعان قىزدارىنىڭ جاساۋى ءۇشىن ميلليونداپ اقشا شاشادى - فوتو
«VIP» بويجەتكەندەر ارتىنان كەلەتىن دۇنيە-مۇلىك، توسەك-ورىندى ەكسكزليۋزيۆتى تاپسىرىس بەرىپ، ەلدەن ەرەكشە جاسايدى ەكەن.
وتاندىق ديزاينەرلەردىڭ سوزىنشە، وزگەلەرگە ۇقساماي، قۇدالارىن تاڭ قالدىرۋ ءۇشىن ءاربىر باي جاڭا ىرىم ويلاپ تاۋىپ جاتاتىن كورىنەدى.
اعايىندى شەبەرلەر كاميلا مەن ءجاميلانى قاراپايىم حالىقتان گورى باي-باعلاندار جاقسى تانيدى. سەبەبى، تۇرمىسقا شىققان باي قىزداردىڭ جاساۋى وسى بويجەتكەندەردىڭ قولىنان شىعادى. ارينە تيىن-تەبەنگە ەمەس. ماتاسىن يتاليا، تۇركيا ەلدەرىنەن اكەلىپ، تالعاممەن تىگەتىن ءار كورپەنىڭ قۇنىنا اقشاسى كوپتەر باسىن دا اۋىرتپايدى.
«اپكەم ءجاميلا شىمكەنتتىڭ كەلىنى. بەس جىل بۇرىن تۇرمىسقا شىققان ۋاقىتتا ساپالى، ءارى تالعاممەن، قازاقى ويۋلى جاساۋ تاپپاي ابدەن قينالدىق. كەيىن نەگە قازاقى قىز جاساۋىن دايىنداماسقا دەپ شەشىم قابىلداپ، كاسىپتى باستاپ كەتتىك.
باسىندا ەۋروپا ەلدەرى مەن تۇركيادان ءۇي توقىماسىن، قۇراق كورپەلەرىن اكەلىپ ساتۋمەن اينالىستىق. كەيىن وتاندىق ءونىمدى ءوزىمىز قولعا الىپ، توي قورجىنىنان باستاپ قىز جاساۋىن تولىق دايىنداۋعا كوشتىك»، - دەيدى ديزاينەر كاميلا.
كاسىپكەر كەلىنشەك قىز جاساۋىن تىگىپ ءجۇرىپ قازاقستاننىڭ ءار وڭىرىندەگى سالت-ءداستۇردىڭ ەرەكشەلىكتەرىن ۇيرەنگەنىن ايتادى.
«باتىس قازاقستاندىقتار قىزدىڭ ارتىنان توسەك-جابدىقتى 12 دانادان دايىنداسا، وڭتۇستىك حالقى كورپە-جاستىقتى تاق سان، ياعني جەتى-توعىزدان عانا اپارادى. سوسىن ءار ءوڭىردىڭ وزىندىك تالابى بار. قىزىلوردالىقتار قىز جاساۋىن - تەك قىزىل، قوڭىرقاي تۇستەن جاساسا، ماڭعىستاۋ، اتىراۋلىقتار اق، كوكشىل تۇسكە عانا تاپسىرىس بەرەدى.
ال، شىمكەنتتىكتەر ءۇشىن بارلىق زات التىن ءتۇستى بولۋى ءتيىس. باتىستىقتار مەن شىمكەنتتىكتەر قىزدارىنىڭ ارتىنان بارلىق زاتىن، ءتىپتى ۇساق-تۇيەگىنە دەيىن اپارادى»، - دەپ ءتۇسىندىردى كاميلا.
الماتىلىقتار مەن استانالىقتار قىز جاساۋىنا كوپ باس قاتىرا بەرمەيدى ەكەن.
«قالا قازاقتارى قىز جاساۋىنا اسا ءمان بەرمەيدى. ولار توسەك-ورىن رەتىندە ەكى نەمەسە بەس دانا عانا كورپەشە تىكتىرەدى. ەسەسىنە قىزداردىڭ ارتىنان جاساۋ رەتىندە قىمبات كوسمەتيكالار جيىنتىعىن ارنايى دايىندالعان ۇلكەن ساندىقپەن اپارادى.
ال، كۇيەۋ بالاعا قۇندىزدان تىگىلگەن تاپىشكەلەر سىيلاپ، قۇداعي، قۇدا، قىزدارىنىڭ ەسىمىن حالات، شاپانداردىڭ ىشىنە التىن جىپتەرمەن ادەمىلەپ تىكتىرەدى.
ءتىپتى كيىتتەردى بۇرىنعىداي دۇكەننەن ساتىپ المايدى، ءار قۇدانىڭ ولشەمىن الىپ كەلىپ تۇرىپ، ارنايى كيىمدەر تىكتىرەدى. ىشىنە «قۇداعيىم - سىرلاسىم، ءتاڭىرىم سەنى قولداسىن!»، «قۇدا - مىڭ جىلدىق» دەگەن سەكىلدى وزدەرىنىڭ نيەت-تىلەكتەرىن كەستەلەتىپ جازدىرتادى. قازىر وسىنداي سىيلىق، ۇردىستەر ساندە»، - دەيدى ساتۋشى.
تاعى ءبىر ايتا كەتەرلىگى قىز جاساۋىنا شەتەلدەگى باي قازاقتار وتە مۇقياتپەن قارايدى ەكەن. ولار امەريكا، حورۆاتيا، گەرمانيا سەكىلدى دامىعان ەلدە تۇرسا دا قىزدارىنىڭ ۇلتتىق ناقىشتاعى توسەك-ورنىن ساتىپ الۋ ءۇشىن قازاقستانعا ارنايى كەلىپ تاپسىرىس بەرەتىن بولىپ شىقتى.
بايلار ءۇشىن ءاربىر بۇيىم ءساندى عانا ەمەس ساپالى جانە ۇنەمى قولدانىستا بولۋى كەرەك. ماسەلەن ولار قول سۇرتەتىن مايلىقتىڭ ءوزىن يتالياندىق جىبەكتەن تىكتىرىپ، مونشاقپەن اشەكەيلەتەدى.
اشەكەيمەن ارلەنىپ، جىبەكتەن تىگىلگەن قول سۇرتەتىن مايلىقتار دا قىز جاساۋىنا كىرەدى. ال ساندىقتار اپپاق تەرىدەن تىگىلۋى ءتيىس.
سونىمەن VIP بويجەتكەندەردىڭ ونشاقتى كورپە، جاستىعى، ۇيگە ارنالعان ءبىر كيەتىن كويلەگى، ماتادان تىگىلگەن داستارحان بۇيىمدارىنىڭ قۇنى عانا ورتا ەسەپپەن 2 ميلليون تەڭگەنىڭ ۇستىنە شىعادى ەكەن.
بۇل باعاعا ىدىس- اياق پەن جيھازدار كىرمەيدى. ولاردى دا قالتالىلار قازاقستاننان ەمەس يتاليا سىندى ەلدەردەن الدىرتاتىن بولىپ شىقتى.