استانانى جاڭبىر سۋىنان قۇتقاراتىن كارىز نىسانى سالىندى

قالا اكىمى اسەت يسەكەشەۆ ەسىل وزەنىنىڭ سول جاعالاۋىندا سالىنىپ بىتكەن نوسەر سۋىنان تازارتاتىن عيماراتتى بارىپ كوردى.

ايتا كەتەرلىگى، مەملەكەت باسشىسىنىڭ تاپسىرماسىمەن قالالىق اكىمدىك تابيعي سەل مەن نوسەردىڭ سۋىنان قورعانۋ ءۇشىن «استانا قالاسىنداعى نوسەرلىك كارىزدەرىنىڭ جۇيەسىن دامىتۋ» جوباسىن ءساتتى تۇردە جۇزەگە اسىرىپ جاتىر.

جوبا استاناداعى نوسەرلىك كارىز جۇيەسىن دامىتۋ جولداردىڭ جابىندىسىن، عيماراتتار مەن قۇرىلىستاردىڭ نەگىزى مەن ىرگەتاسىنىڭ ساقتالۋىن قامتاماسىز ەتەدى.

تازالايتىن نىساننىڭ تاۋلىگىنە 19590 تەكشە مەتر (سالىستىرمالى تۇردە الساق، بۇل شامامەن 4 مىڭ جۇزەتىن باسسەين) سۋدى وتكىزە الادى.

ەستەرىڭىزگە سالا كەتەيىك، جازدا نوسەر جاڭبىردىڭ سۋى ەلوردالىقتاردى ابىگەرگە سالاتىن بولاتىن. سەبەبى، سول جاعالاۋ جاقتا جاۋىن-شاشىننان ارتىلعان تاسقىن سۋدى كارىز جۇيەسى رەتتەۋگە شاماسى جەتپەدى ءارى وعان ورىن دا قاراستىرىلماعان بولاتىن.

مەملەكەت باسشىسى جاۋىن سۋىنىڭ ماسەلەسىن شەشۋدى تاپسىرعان بولاتىن. وسىعان بايلانىستى، قالا اكىمدىگى جاۋىن سۋىن تازارتۋ جانە سۋ تارتۋ بويىنشا كەشەندى باعدارلاما جاساپ شىقتى. باعدارلامادا يننوۆاتسيالىق تەحنولوگيا مەن تەحنيكالىق شەشىمدەرمەن بىرگە، ەڭ ۇزدىك الەمدىك تاجىريبەلەر دە ەسكەرىلدى.

2017-جىلدىڭ سوڭىنا دەيىن تازارتاتىن عيمارات كەشەنى پايدالانۋعا بەرىلىپ، تۇران داڭعىلىنان سىعاناق كوشەسىنىڭ قيىلىسىنا دەيىن جانە ەسىلدەن كىشى تالدىكول وزەنىنە دەيىن سۋ ايدايتىن كوللەكتور ىسكە قوسىلادى.