بۇل تۋرالى kostanaytany.kz حابارلايدى.
باسىلىمنىڭ جازۋىنا قاراعاندا، وبلىس اكىمى جانىنداعى ايەلدەر ءىسى جانە وتباسى- دەموگرافيالىق ساياسات جونىندەگى كوميسسيانىڭ وتىرىسى وتكەن. جيىندى وتباسى، نەكەنىڭ تۇراقتىلىعى ماسەلەلەرى قارالىپتى.
قوستاناي وبلىسى رەسپۋبليكا بويىنشا اجىراساتىنداردىڭ كوشىن باستاپ تۇر - ەكىنشى ورىندا.
«2007 -جىلدان بەرى تىركەلگەن نەكەلەردىڭ سانى 6561-دەن 5627-گە دەيىن تومەندەدى. كەرىسىنشە، اجىراسۋ كورسەتكىشى جوعارى - 2605-تەن 3125-گە دەيىن. جىل باسىنان بەرى 9 ايدا 4603 نەكەلەسۋ، 2440 اجىراسۋ تىركەلدى. بىلتىرعى جىلى اجىراسۋ كورسەتكىشى جوعارى وڭىرلەر قاتارىندا سارىكول (86,6 پايىز)، مەڭدىقارا (86 پايىز) قوستاناي (77,5 پايىز) اۋداندارى مەن ليساكوۆ قالاسى (86 پايىز) بولسا، بيىلعى جىلدىڭ 9 ايىنىڭ جاعدايى كوڭىل كونشىتەر ەمەس - مەڭدىقارا (91 پايىز)، التىنسارين (90 پايىز)، فەدوروۆ (82,6 پايىز)، قوستاناي (81,6 پايىز) اۋداندارى «كوش باستاپ تۇر. كەرىسىنشە، كۇنگەيدەگى جانكەلدين، امانكەلدى اۋداندارىندا اجىراسۋ كورسەتكىشى الدەقايدا تومەن ەكەن. ال جۇكتىلىك سالدارىنان ەرتە جاستان ۇيلەنەتىندەر سانى 2008 -جىلمەن سالىستىرعاندا 2,6 ەسەگە ازايعانىن اتاپ وتۋگە بولادى»، - دەدى وبلىستىق ادىلەت دەپارتامەنتىنىڭ ءبولىم باسشىسى گ. مۋسينا.
ەلىمىزدىڭ ادىلەت مينيسترلىگىنىڭ ەسەبىنە سۇيەنسەك، رەسپۋبليكانىڭ سولتۇستىگىندەگى پاۆلودار، قوستاناي، سولتۇستىك قازاقستان، اقمولا وبلىستارىندا ءاربىر ەكىنشى نەكەنىڭ سوڭى اجىراسۋعا اكەپ سوعادى ەكەن. سالىستىرار بولساق، وڭتۇستىك قازاقستان، ماڭعىستاۋ، اتىراۋ وبلىستارىندا بۇل كورسەتكىش الدەقايدا تومەن - 26-30 پايىز ارالىعى. ال اجىراسۋعا بارۋدىڭ باسىم بولىگى (83 پايىز) سوت ارقىلى جۇزەگە اسادى، - دەدى مامان.
رەسمي دەرەككە سۇيەنسەك، قازاقستاندا ءاربىر ءۇشىنشى وتباسى ويراندالۋدا. بۇل ازداي، كامەلەت جاسىنا تولماعان بالالى اتا- انالاردىڭ ايىرىلىسۋى جيىلەگەن. ءاربىر 5- ءتىرى جەتىمەك نە اكەسىنىڭ، نە شەشەسىنىڭ قولىندا ءومىر ءسۇرىپ جاتىر.
وبلىس اكىمىنىڭ ورىنباسارى مارات جۇندىبايەۆ اتالعان ماسەلەگە جاۋاپتى مەكەمەلەرمەن قاتار ۇكىمەتتىك ەمەس ۇيىمداردى دا بەلسەندى جۇمىس اتقارۋعا شاقىردى.
«نەكەگە وتىراتىندار مەن اجىراسۋعا كەلەتىندەرگە ۇ ە ۇ وكىلدەرى ارنايى كەڭەس بەرىپ، شاڭىراقتى شايقالتپاي، بەرەكەسىن ساقتاپ قالۋدىڭ جولدارىن ءتۇسىندىرىپ وتىرسا. ايماعىمىزدا جىل باسىنان بەرى 7 ايدا جانۇيالاردىڭ 58 پايىز اجىراسقانى دابىل قاقتىرارلىق جايت. بۇل بالا تۋۋ كورسەتكىشىنە دە كەرى اسەرىن تيگىزىپ وتىر - 5,5 پايىز تومەندەگەن. وبلىستىق ءبىلىم باسقارماسى وتباسىلىق قۇندىلىقتاردى دارىپتەيتىن ساباق ەنگىزۋ قاجەت. الەۋمەتتىك جارنامالاردىڭ دا زور ىقپالى بار. بۇل تۇيتكىلدى وڭ شەشۋگە ب ا ق وكىلدەرىنىڭ دە اتسالىسقانى اسا ماڭىزدى. تەلەديدار، راديو، ينتەرنەت باسىلىمدار، باسپا بەتتەرىندە ءالى دە ۇلگى الارلىق ماتەريالداردىڭ جارىق كورۋى جاعدايدىڭ جاقسارۋىنا ۇلكەن سەبەپ بولماق. بۇگىن ماسەلەنىڭ انىعىنا تالداۋ جاسادىق. ال الداعى قىسقا مەرزىمدە بارلىقتارىڭىزدان ناقتى ۇسىنىستار كۇتەمىن»، - دەدى م. جۇندىبايەۆ.