ەلىمىزدەگى ۇزدىك دومبىراشى قىز- كەلىنشەكتەر انىقتالدى
بارلىعى 14 ۇمىتكەر قاتىسقان دودادا اتىراۋلىق نۇراي زينور باس جۇلدەنى جەڭىپ السا، الماتىلىق ايگەرىم نەتاليەۆا مەن استانالىق توقجان ۇمبەت - ءبىرىنشى، قىزىلوردالىق فاريدا قۇدايبەرگەنوۆا - ەكىنشى، الماتىلىقتار سىمبات ءابدۋاحاپ، تۇرسىنزادا ءالىمجانوۆا، ءمولدىر قويىسوۆا ءۇشىنشى ورىنعا يە بولدى.
وسى بايقاۋعا ع. قۇرمانعاليەۆ اتىنداعى باتىس قازاقستان وبلىستىق فيلارمونياسى داۋلەتكەرەي اتىنداعى حالىق اسپاپتار وركەسترىنىڭ مۇشەسى راۋشان شاقانايەۆا جانىبەك اۋدانىنىڭ اتىنان قاتىسىپ، ءۇشىنشى ورىنعا يە بولدى. ونىڭ ايتۋىنشا، ءۇش كەزەڭنەن تۇرعان سايىس بارىسىندا قاتىسۋشىلار نەگىزىنەن دينانىڭ كۇيلەرىن ورىندادى. بارلىعى 23 تۋىندى جاتتالدى. وسىلاردىڭ ىشىندە كەيبىرەۋىن مىندەتتى تۇردە جانە جەرەبە بويىنشا، ءبىرقاتارىن قازىلار القاسىنىڭ سۇراۋىمەن ورىنداۋعا ءتيىستى بولدى.
راۋشان م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىن ءداستۇرلى مۋزىكالىق ونەر ماماندىعى بويىنشا ەركىن نۇرىمبەتوۆتىڭ كلاسىندا بىتىرگەن. داۋلەتكەرەي اتىنداعى وركەستردە 2007 -جىلدان بەرى قىزمەت ەتەدى.
«بۇل - راۋشاننىڭ رەسپۋبليكالىق دەڭگەيدەگى ءبىرىنشى تابىسى. بۇعان دەيىن ايماقتىق، وبلىستىق سايىستاردا جۇلدە الىپ جۇرگەن راۋشان شاقانايەۆا - وركەستردىڭ مۋزىكانتى ءارى جەكە ورىنداۋشىسى. ول ليريكالىق، سونداي- اق كۇشتى قاجەت ەتەتىن شىعارمالاردى دا ءساتتى ورىنداي بىلەدى. بۇل رەتتە وركەستردەگى تارتىسى كەيبىر ەر ادامداردان دا ارتىق شىعىپ وتىرادى»، - دەدى «قازاقپارات» تىلشىسىنە داۋلەتكەرەي اتىنداعى وركەستردىڭ باس ديريجەرى ءارى كوركەمدىك جەتەكشىسى، كومپوزيتور ەركىن نۇرىمبەتوۆ.
اۆتور: ەلجان ەرالى