انكارادا تۇركىتىلدەس مەملەكەتتەردىڭ قۇرىلتايى ءوتىپ جاتىر
اتاتۇرىك اتىنداعى مادەنيەت، ءتىل جانە تاريح جوعارى قۇرىلىم، تۇرىك ءتىلى قۇرىلىمى جانە جاڭا تۇركيا ستراتەگيالىق زەرتتەۋلەر ورتالىعى بىرلەسىپ ۇيىمداستىرعان اۋقىمدى شاراعا تۇركيانىڭ مادەنيەت جانە تۋريزم مينيسترلىگى قولداۋ كورسەتىپ وتىر.
قۇرىلتايدىڭ اشىلۋ سالتاناتىندا تۇركيا پرەمەر-ءمينيسترىنىڭ ورىنباسارى فيكري ىشىك، تۇركيانىڭ مادەنيەت جانە تۋريزم ۆيتسە-ءمينيسترى حۋسەين يايمان، اتاتۇرىك اتىنداعى مادەنيەت، ءتىل جانە تاريح جوعارى قۇرىلىمىنىڭ باسشىسى دەريا ءورس، تۇرىك ءتىلى قۇرىلىمىنىڭ باسشىسى مۇستافا كاچالين، سونىمەن بىرگە جاڭا تۇركيا ستراتەگيالىق زەرتتەۋلەر ورتالىعىنىڭ باسشىسى حاسان دجەلال گۇزەل ءسوز سويلەپ، قاتىسۋشىلارعا ساتتىلىك تىلەدى.
قۇرىلتاي ۇيىمداستىرۋشىلارى مەن قاتىسۋشىلارىنا تۇركى اكادەمياسى حالىقارالىق ۇيىمىنىڭ (TWESCO) باسشىسى دارحان قىدىرالىنىڭ ارنايى قۇتتىقتاۋىن ۇيىمنىڭ عىلىمي قىزمەتكەرى اينۇر ماەمەروۆا جەتكىزدى.
2017-جىلدىڭ تۇركيادا تۇرىك ءتىلى جىلى بوپ جاريالانۋىنا وراي ۇيىمداستىرىلعان شاراعا ازەربايجان، گەرمانيا، جاپونيا، يران، يراك، موڭعوليا، قازاقستان، قىرعىزستان، قىرىم، وزبەكستان، تۇركيا، تۇرىكمەنستان، رەسەي فەدەراتسياسى، ۋكراينا جانە باسقا مەملەكەتتەردەن 300 دەن استام دەلەگات قاتىسۋدا. قوعام قايراتكەرلەرى، عالىمدار مەن ىزدەنۋشىلەر قۇرىلتاي اياسىندا تۇركى الەمىنىڭ ينتەگراتسياسى تۇرعىسىنان تۇرىك ءتىلىنىڭ الەمدىك تىلدەر اراسىنداعى ورنىن ايقىنداۋ، تۇركى تىلدەرىنىڭ الىپپەلەرى، سوزدىك قورى، ورتاق تەرمينولوگياسى، ءوزارا اۋدارما جاساۋ سەكىلدى ماسەلەلەرگە بايلانىستى باياندامالار جاسايدى.
نەگىزگى عىلىمي بولىمنەن تىس ءتۇرلى مادەني باعدارلامالاردى قامتيتىن قۇرىلتاي جۇمىسى 16- قاراشا كۇنى قورىتىندىلانادى.