قازاقستاندىقتار شەت ەلگە شىققاندا كولىگىن قالاي ساقتاندىرا الادى؟
ايتا كەتسەك، جانات قۇرمانوۆ پارلامەنت ماجىلىسىندە «ق ر كەيبىر زاڭنامالىق اكتىلەرىنە ساقتاندىرۋ جانە ساقتاندىرۋ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرعان بولاتىن.
پارلامەنت ءماجىلىسىنىڭ دەپۋتاتتارىمەن اتالعان زاڭ جوباسىن تالقىلاۋ بارىسىندا دەپۋتاتتار قازاقستاندىقتاردىڭ شەت ەلگە شىققاندا اۆتوكولىكتەرىنىڭ ساقتاندىرۋ پوليسىنىڭ كۇشى بولمايتىنىن، وسى سەبەپتى ماسەلە تۋىنداپ جاتاتىنىنا الاڭداۋشىلىق ءبىلدىردى. بۇل ماسەلەنىڭ شەشۋدىڭ جانات قۇرمانوۆتىڭ ايتۋىنشا ءۇش جولى بار. «ترانشەكارالىق ساقتاندىرۋ دەگەن ءبىزدىڭ كورشىلەس ەلدەرمەن ينتەگراتسياعا ءتۇسۋ اياسىندا ساقتاندىرۋ كومپانيالارى ءۇشىن وتە ماڭىزدى ماسەلە. ءبىر عانا رەسەيمەن 7 مىڭ شاقىرىمدا شەكتەسىپ جاتىرمىز. بۇل تۇرعىدا بىرنەشە باعىت بويىنشا جۇمىس ءجۇرىپ جاتىر. ەڭ ءبىرىنشى كەزەكتە، ءبىز قازاقستانعا «جاسىل كارتا» جوباسىنا قاتىسۋ كەرەك پە جوق پا دەگەن ماسەلەگە قاتىستى ساراپتاما جۇرگىزدىك. دەمەك، «جاسىل كارتاعا» ەنگەن مەملەكەتتىڭ ازاماتتارى (ول كارتادا رەسەي مەن بەلارۋس ەلدەرى، ەۋروپا مەملەكەتتەرى بار) قوسىمشا ساقتاندىرۋعا مۇقتاج بولمايدى. قازاقستان «جاسىل كارتاعا» ەنسە، وندا ءبىزدىڭ ازاماتتاردىڭ كولىكتەرىنىڭ ساقتاندىرۋ پوليسى اتالعان ەلدەردە كۇشىن جويمايدى. سوندىقتان، بۇل ماسەلەنى تالقىلاپ جاتىرمىز»، - دەيدى ول.
جانات قۇرمانوۆتىڭ ايتۋىنشا، ماسەلەنى شەشۋدىڭ ەكىنشى جولى ەاەو اياسىندا ساقتاندىرۋ ۇيىمدارى پوليستەرىنىڭ وسى وداققا كىرەتىن ەلدەردە ورتاق مويىندالۋى تۋرالى كەلىسىمگە قول جەتكىزۋ.
«دەمەك، ەگەر ءبىزدىڭ ەلدەگى كليەنت قازاقستاندا ساقتاندىرۋ تۋرالى كەلىسىمگە كەلسە، بۇل ءپوليستىڭ رەسەيدە دە كۇشى بار بولادى. ۇشىنشىدەن وسى زاڭ جوباسى اياسىندا مەن سىزدەرگە تانىستىرعان ونلاين-ساقتاندىرۋ جۇيەسى. دەمەك، ەگەر قازاقستاندىق ازامات شەت ەلگە شىقپاي تۇرىپ، ونلاين-ساقتاندىرۋدى ساتىپ السا، وندا بۇل سۇراقتار شەشىلەدى. مەنىڭشە، شەت ەلگە شىعاتىن ازاماتتارعا وسى جۇيە ءتيىمدى. سەبەبى مۇنداي جولدى ءبىزدىڭ زاڭنامامەن ۇيلەستىرۋ قاجەتتىلىگى تۋىندامايدى. ەگەر ساقتاندىرۋ پوليستەرىنىڭ مويىندالۋى جولىن تاڭداساق، قازاقستانداعى جانە رەسەيدەگى ساقتاندىرۋ كومپانيالارىنىڭ شارتتارى، باعالارى ءارتۇرلى ەكەنىن ەسكەرۋىمىز كەرەك. سوندىقتان ونلاين-ساقتاندىرۋ جولى الدەقايدا ءتيىمدى دەر ەدىم»، - دەيدى جانات قۇرمانوۆ.
اۆتور: ايان بەكەن ۇلى