بۇل تۋرالى بۇكىل الەمدىك جابايى تابيعات قورىنىڭ (WWF) التاي- سايان بولىمشەسىنەن ءمالىم ەتتى، دەپ حابارلايدى قازاقپارات.
WWF التاي- سايان بولىمشەسى شىعىس قازاقستان وبلىسىندا قار بارىسىن ىزدەۋ جۇمىستارىن Pernod Ricard Kazakhstan كومپانياسىنىڭ قولداۋىمەن اعىمداعى جىلدىڭ كوكتەمىندە باستاعان بولاتىن. WWF التاي- سايان بولىمشەسىنىڭ باسپا ءسوز حاتشىسى تاتيانا يۆانيتسكايانىڭ ايتۋىنشا، ەكسپەديتسياعا كاتونقاراعاي ۇلتتىق ساياباعىنىڭ جانە بۇكىلالەمدىك جابايى تابيعات قورىنىڭ قازاقستانداعى سەرىكتەسى - قازاقستاننىڭ بيولوگيالىق الۋان تۇرلىلىگىن ساقتاۋ قاۋىمداستىعىنىڭ قىزمەتكەرلەرى قاتىسقان. ولار وسى جىلدىڭ شىلدە- قازان ايلارىندا كاتونقاراعاي ۇلتتىق ساياباعى اۋماعىنا ءۇش مارتە ەكسپەديتسياعا شىعىپ، قار بارىسى ءجۇرۋى مۇمكىن جەرلەرگە 19 اۆتوماتتى كامەرا ورناتقان.
وكىنىشكە وراي، ماماندار دالالىق جۇمىستار بارىسىندا قار بارىسىنىڭ ءىزىن تابا المادى. ارنايى ورناتىلعان كامەرالار ءسىبىر تاۋ ەشكىسىن، مارال، ايۋ، التاي ۇلارىن سۋرەتكە ءتۇسىرىپ العان. «2015 -جىلى كاتونقاراعاي ۇلتتىق ساياباعىندا قار بارىسىنىڭ 4-5 ءتۇرىنىڭ ءىزى تابىلعان بولاتىن. بۇل ناتيجە WWF باستاماسىمەن جانە «ءسىبىر ساۋلىعى» كورپوراتسياسىنىڭ «سەنىڭ توڭىرەگىڭدەگى الەم» قورىنىڭ قولداۋىمەن وتكەن دالالىق ەكسپەديتسيا قورىتىندىسىندا الىنعان ەدى.
الايدا، وكىنىشكە وراي بۇل جولى سەرىكتەستەرىمىز كاتونقاراعاي سيرەك كەزدەسەتىن جىرتقىش اڭدى تابا المادى. مۇنى ءتۇسىندىرۋدىڭ ەكى جولى بار. ياعني قار بارىسى ۇلتتىق ساياباق اۋماعىنان جوعالىپ كەتتى نەمەسە ەسەپكە الۋ توبى بارىنشا تىڭعىلىقتى جۇمىس ىستەمەدى. ونداي جايت تا ورىن الىپ تۇرادى. قاراشا ايىندا كاتونقاراعاي قار بارىسىنا نە بولعانىن ءبىلۋ ءۇشىن WWF ق ر ءبىلىم جانە عىلىم مينيسترلىگى زوولوگيا ينستيتۋمەن بىرگە تاعى ءبىر ەكسپەديتسياعا باستاماشالىق جاسادى. وسى ايدىڭ سوڭىندا ينستيتۋت قىزمەتكەرلەرى ۇلتتىق ساياباقپەن استاسىپ جاتقان قىرقالارعا فوتوكامەرالار ورنالاستىرادى. كەلەسى جىلدىڭ اقپانىندا بارلىق كامەرالار تەكسەرىلەدى»، - دەدى WWF التاي- سايان بولىمشەسى جوباسىنىڭ اعا ۇيلەستىرۋشىسى الەكساندر كارناۋحوۆ.
اۆتور: مارلان جيەمباي