ەلباسى: الاش يدەياسى - اتا-بابانىڭ دەربەس ەل بولۋ جولىنداعى اماناتىمەن ۇشتاسىپ جاتىر
حالىقارالىق دەڭگەيدەگى جيىنعا ەلىمىزدەگى بەلدى الاشتانۋشىلار، ق ر مەملەكەتتىك حاتشىسى گۇلشارا ءابدىقالىقوۆا، پارلامەنت ءماجىلىسىنىڭ دەپۋتاتتارى، تۇركيا، رەسەي، ازەربايجان ەلدەرىنەن عالىمدار قاتىسۋدا.
جيىن بارىسىندا گۇلشارا ءابدىقالىقوۆا قاتىسۋشىلارعا ق ر پرەزيدەنتى نۇرسۇلتان نازاربايەۆتىڭ قۇتتىقتاۋ ءسوزىن وقىپ بەردى.
«بارشاڭىزدى كونفەرەنسيا جۇمىسىنىڭ باستالۋىمەن شىن جۇرەكتەن قۇتتىقتايمىن! الاش قوزعالىسىنىڭ 20- عاسىردىڭ باسىنداعى قازاق قاۋىمىنىڭ ساياسي-الەۋمەتتىك قۇقىقتارىن قورعاۋ، ۇلتتىق بىرەگەيلىگىن ساقتاپ قالۋ جولىنداعى كۇرەسى ەلگە قىزمەت ەتۋدىڭ جارقىن كورىنىستەرىنىڭ ءبىرى. الاش قوزعالىسىنىڭ پاسسيونارلىق يدەيالارى ءبىزدىڭ اتا-بابالارىمىزدىڭ ازاتتىق الىپ، دەربەس مەملەكەت قۇرۋ جولىنداعى سان عاسىرلىق اماناتىمەن ۇشتاسىپ جاتىر. سول كەزدەگى ۇلت زيالىلارى ارمان ەتكەن مەملەكەت تاۋەلسىزدىگى مەن ۇلت بوستاندىعىنا بۇگىنگى ۇرپاق قول جەتكىزدى. ەلىمىز ەگەمەندىك الىپ، الەمنىڭ الدىڭعى قاتارلى مەملەكەتتەرىمەن تەرەزەسىن تەڭەستىرىپ وتىر. مەن «بولاشاققا باعدار: رۋحاني جاڭعىرۋ» اتتى ماقالامدا تاعىلىمى مول تاريحىمىزدى زەردەلەۋگە، ءتولتۋما مادەنيەتىمىزدى قولداۋعا قاتىستى ناقتى مىندەتتەردى اتاپ كورسەتتىم. ءبىزدىڭ قوعامدىق سانانى قازىرگى زاماننىڭ تالابىنا ساي جاڭعىرتۋ ارقىلى ەلىمىزدىڭ تۇراقتى دامۋىن قامتاماسىز ەتۋدى ماقسات ەتىپ وتىرمىز. مەملەكەتىمىزدىڭ ەكونوميكالىق الەۋەتى ارقىلى حالقىمىزدىڭ باي تاريحي ءارى رۋحاني مۇراسىن دارىپتەۋگە دە زور مۇمكىندىك جاسالا بەرمەك. بۇگىنگى كەلەلى جيىندا تاريحىمىزدىڭ تاۋەلسىز ەل ومىرىمەن ساباقتاستىعىن اشىپ كورسەتەتىن دايەكتى پىكىرلەر، عىلىمي ىزدەنىستەردىڭ ناتيجەلەرى جاريا ەتىلەدى دەپ كامىل سەنەمىن. كونفەرەنسيانىڭ جۇمىسىنا تابىس تىلەيمىن»، - دەپ گۇلشارا ءابدىقالىقوۆا ەلباسىنىڭ قۇتتىقتاۋ حاتىن اياقتادى.
كونفەرەنسيانىڭ پلەنارلىق ءماجىلىسى ⅩⅩ عاسىر باسىنداعى الەمدى سىلكىندىرگەن وقيعالار اياسىنداعى الاش قوزعالىسىنىڭ قىزمەتىن اشىپ كورسەتكەن سەكسيالىق باس قوسۋلارعا ۇلاسپاق.
جيىن سوڭىندا عىلىمي-تاجىريبەلىك كونفەرەنسياعا قاتىسۋشىلار الاش ارىستارىن ۇلىقتاۋ، ولاردىڭ مۇرالارىن زەرتتەۋدى جۇيەلەپ، جاس ۇرپاقتى پاتريوتتىق رۋحقا تاربيەلەۋ ءىسىن الاش مۇراتتارىمەن ساباقتاستىرۋ ماسەلەلەرى كورىنىس تاپقان قارار قابىلداۋ جوسپارلانىپ وتىر.
اۆتور: ايان بەكەن ۇلى