جەدەلحاتتا مەملەكەت باسشىسىنىڭ داڭقتى ديقان- مەحانيزاتور، قوعام قايراتكەرى، سوتسياليستىك ەڭبەك ەرى كامشات دونەنبايەۆانىڭ دۇنيەدەن وتكەنى تۋرالى حاباردى زور كۇيزەلىسپەن قابىلداعانى ايتىلعان. «كامشات بايعازى قىزى كوپ جىلدار بويى مەحانيزاتور بولىپ ەڭبەك ەتىپ، جەر جىرتىپ، استىق ءوسىرىپ، ەلىمىزدىڭ ءوسىپ- وركەندەۋىنە ءوز ۇلەسىن قوستى. كەزىندە باسقا دا ءبىرقاتار قىزدار كامشاتقا ەلىكتەپ، مەحانيزاتورلىق ماماندىقتى تاڭداپ، ەلىمىزدەگى بۇگىنگى بەرەكە مەن مولشىلىقتىڭ نەگىزىن قالادى. بويىندا قازاق ايەلىنە ءتان اقىل مەن پاراسات، ەڭبەككە دەگەن قاجىر مەن قايرات شەبەر ۇيلەسىم تاپقان كامشات دونەنبايەۆانىڭ ەسىمىن، ونىڭ اتقارعان ىستەرى مەن جارقىن ديدارىن قازاقستاندىقتار ءاردايىم جادىندا ساقتايدى دەپ سەنەمىن»، - دەلىنگەن جەدەلحاتتا.
بۇگىن كامشات بايعازى قىزى دونەنبايەۆا 80 جاسقا قاراعان شاعىندا دۇنيەدەن وزدى. كامشات دونەنبايەۆا 1937 -جىلى قوستاناي وبلىسى ۇزىنكول اۋدانى لەنين سوۆحوزىندا تۋعان. ەڭبەك جولىن ۇزىنكول ەليەۆاتورىندا باستاعان. 1961 -جىلدان قوستاناي وبلىسى بوروۆسكيي اۋدانى «حاركوۆسكيي» سوۆحوزىندا مەحانيزاتور بولىپ ەڭبەك ەتكەن. وسى وبلىستىڭ مەڭدىقارا اۋدانىنداعى «كامەنسك- ۋرالسكي» كەڭشارىندا مەحانيزاتورلار دايىندايتىن كۋرستى، كەيىن قوستاناي اۋىل شارۋاشىلىعى تەحنيكۋمىن سىرتتاي وقىدى. تىڭ ارداگەرى، ارداقتى انا، اياۋلى اجە كامشات بايعازى قىزى قوعامدىق جۇمىستاردان قالىس قالمادى.
«ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ مۇشەسى، وبلىستىق ايەلدەر ىستەرى جانە وتباسىلىق- دەموگرافيالىق ساياسات جونىندەگى كوميسسيانىڭ قۇرامىندا بىرنەشە قىزمەتتەردى اتقاردى. 1980-1985 -جىلدارى ك س ر و جوعارعى كەڭەسىنىڭ ۇلتتار كەڭەسى ءتوراعاسىنىڭ ورىنباسارى بولدى. 1976 -جىلى ك س ر و مەملەكەتتىك سىيلىعىنىڭ لاۋرەاتى. ەكى رەت لەنين وردەنىمەن، قۇرمەت بەلگىسى وردەنىمەن ماراپاتتالعان. 1990-1993 -جىلدارى وسى كەڭشاردا قاۋىپسىزدىك تەحنيكاسىنىڭ ينجەنەرى، 1993 -جىلدان شارۋا قوجالىعىن باسقاردى. قوستاناي وبلىسىنىڭ جانە قوستاناي قالاسىنىڭ قۇرمەتتى ازاماتى.