«مەنى تانىپ وتىرسىزدار ما؟ ءبىزدىڭ وقۋشى كەزىمىزدەگى ءنومىرى ءبىرىنشى جۇلدىز مەيرامبەك ەدى. «ويباي جەتىم ەكەن، بالالار ۇيىندە ءوسىپتى» دەپ شۋلاپ جاتاتىن جۇرت. داۋىسىمىز جەتسە دە، جەتپەسە دە «بوزتورعايدى» ايتىپ قويماۋشى ەدىك. ءسويتىپ ءجۇرىپ تارازعا كوللەدجگە ءتۇستىم. ءبىر كۇنى «جىگىت سۇلتانى» بايقاۋى بولاتىن بولىپ، سول جەردە مەيرامبەك بەسپايەۆتىڭ ءوزى توقتار سەرىكوۆپەن بىرگە ءان ايتادى ەكەن دەپ ەستىپ، كورۋگە باردىق. ساحنانىڭ ارتىندا تۇرعان ەدىم، ءبىر كىسىلەر مەنى توقتارمەن تانىستىردى. توقتار مەيرامبەكتى شاقىرىپ الدى.. ءسويتىپ تۇرعاندا مەيرامبەك «سەن اناۋ ازىمبەكتى جەڭگەن اينۇرسىڭ با» دەدى عوي. جۇرەگىم توقتاپ قالا جازدادى! مەيرامبەك بەسپايەۆ مەنى تانيدى ەكەن!!!ۇيگە كەلىپ تۇنىمەن ۇيىقتاي المادىم.
تالاي ءانىن تىڭداپ، اڭىز ادامعا اينالعان ءانشى مەنى بىلەدى ەكەن! قالاي ۇيىقتايسىڭ مۇندايدا! ءسويتىپ تاڭەرتەن ويانسام تەلەفون شىرىلدايدى! ترۋبكانى كوتەرسەم مەيرامبەك!!! «اينۇر، تەز ءبىزدىڭ ۇيگە قوناققا كەل، توقتار ەكەۋىڭدى ايتىستىرامىن» دەدى.. قۇداي بەردى دەگەن وسى! بولدى، مەن جۇلدىزبىن! دومبىرامدى كوتەرىپ شاۋىپ باردىم! مەيرامبەك ءان سالدى، ءبىز ايتىستىق! ەستەن كەتپەس تاماشا ءبىر كۇن بولدى. بوتەن ويدان ادا، قىز جىگىت بوپ قىلتىڭداۋى جوق مولدىرەگەن تازا سىيلاستىق بار ەدى ارامىزدا. ءبىراز ۋاقىتتان سوڭ مەن الماتىدا حالقارالىق ايتىستىڭ باس جۇلدەسىن تويوتا كوروللانى ۇتىپ الدىم، جاسىم 19-دا!
ءبىرىنشى بولىپ مەيرامبەك كەلدى، «بارلىق تانىسىڭدى جيناپ كەل، داستارحان جاساپ قويدىم» دەدى. تاڭ اتقانشا تاعى تويلاتتىق.. كەيىننەن الماتىدا كۆارتپلاتا تولەي الماي قينالىپ جۇرگەن كەزىمىزدە «ءبارىن قويىپ، ءبىزدىڭ ۇيگە كوشىڭدەر، بىرگە تۇرامىز» دەدى... وتباسىمىزبەن بىرگە دە تۇردىق... اتا- اناسىن ءوز اكە- شەشەمدەي جاقسى كوردىم. كەيىن مارحاباتپەن تانىستىق، «ۇيلەنەم، وسى قىزدى ەرەكشە ءسۇيىپ تۇرمىن» دەدى. بىرگە ءجۇرىپ بەتاشار وتكىزدىك. تويلاتتىق. مەيرامبەك بيىكتەگەن سايىن قاراپايىم بولدى. ءبارى ونىڭ داۋىسىنا تاڭ قالادى.
مەن ونىڭ جۇرەگىنىڭ كەڭدىگىنە تاڭ قالامىن. جۇرەگى ۇلكەن ادام عانا سونداي داۋىسقا يە بولادى! ءبىر جاس جۇلدىز وعان «ءسىز سياقتى ءنومىرى 1- بولام مەن» دەپتى، سوندا ول «مەنى ءبىرىنشى دەپ كىم ايتتى، مەن التەكەڭ، نۇرلان اعادان كەيىنگى 50- ءانشى بولسام دا شۇكىر» دەپ جاۋاپ بەرىپتى! ول شىنىندا اللانىڭ ەرەكشە جاراتقان پەندەسى! بارلىق قۋانىشىڭا ورتاقپىن. تۋعان كۇنىڭمەن، ەسكى دوس!»، - دەپ جازدى ايتىسكەر اقىن جەلىدەگى پاراقشاسىندا.
قازاق حالقىنىڭ سۇيىكتى ۇلى كۇنى كەشە رەسپۋبليكا سارايىندا جەكە كەشىن وتكىزدى. الماتىنىڭ تۇرعىندارىمەن ساعىنا قاۋىشقان ءانشى كونسەرتتەن كەيىن اق داستارحان جايىپ، دوس جاراندارىنىڭ ورتاسىندا تۋعان كۇنىن اتاپ ءوتتى.