ەلباسى جاس تەننيسشىلەرمەن كەزدەستى

قوستاناي. قازاقپارات - قوستانايدا ەكى كۇندىك جۇمىس ساپارىمەن جۇرگەن ەلباسى نۇرسۇلتان نازاربايەۆ تەننيس ورتالىعىنا باردى، دەپ حابارلايدى قازاقپارات ءتىلشىسى.

ەلباسى حالىق اراسىندا ۇلكەن تەننيستى تانىمال ەتۋگە باعىتتالعان سپورت كەشەنىنىڭ قىزمەتىمەن تانىستى.

سپورتتىق نىسان 2015-جىلى سالىنعان، 788 ميلليون تەڭگە جۇمسالىپ، قۇرىلىس جۇمىستارى 4 جىل ءجۇردى. عيمارات ىشىندە 3 كورت، سىرتتا تاعى سونداي 3 تەننيس الاڭى بار. ورتالىق 20 ادامدى جۇمىسپەن قامتىپ وتىر.

جاس تەننيسشىلەر پرەزيدەنت الدىندا جەتىستىكتەرىن جارىسا جەتكىزدى. ەلباسى دا بالالارعا ۇلكەن تەننيسپەن اينالىسقانىن ايتتى.

«تەننيس - مەنىڭ سۇيىكتى سپورتىم. كەزىندە مەن دە ويناعانمىن. تەك ءبىلىمى مەن دەنساۋلىعى بار ادام عانا جەڭىسكە جەتەدى دەپ ۇنەمى ايتىپ جۇرەمىن. جاستار سپورتپەن بەلسەنە اينالىسۋى كەرەك. سەندەر دە دوستارىڭدى سپورتپەن شۇعىلدانۋعا شاقىرىڭدار!»، - دەدى ەلباسى.

نۇرسۇلتان ءابىش ۇلى ءوز سوزىندە حالىقارالىق دارەجەدە ويناپ جۇرگەن قازاقستاندىقتار تۋرالى ايتتى. سونداي-اق، ۇلكەن تەننيستەن قوستاناي قۇراماسىنىڭ باپكەرىنە تاپسىرمالار جۇكتەدى.

ەسكە سالساق، ەلباسى بۇعان دەيىن اۋىل شارۋاشىلىعى تاۋار وندىرۋشىلەرىمەن كەزدەسىپ، ولارعا استىق سۇرىپتاۋدا تىڭ تەحنولوگيالاردى پايدالانۋ قاجەتتىگىن ايتقان بولاتىن.