ماجىلىستەگى كوممۋنيستەر فراكسياسى وسى تۇيتكىلدى ماسەلەنى كوتەرىپ، ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆاعا دەپۋتاتتىق ساۋال جولدادى، دەپ حابارلايدى sputniknews.kz.
«ماجىلىسكە ورالمانداردان ۇندەۋ حات كەلىپ ءتۇستى، ولار 1991-1992 -جىلدارى ەلگە موڭعوليادان كوشىپ كەلگەن قانداستارىمىز. ولار وزدەرىنىڭ زەينەتاقىمەن قامتاماسىز ەتىلۋگە قاتىستى تۋىنداعان جاعدايلارعا قاتتى الاڭداپ وتىرعانىن حابارلادى»، - دەدى جامبىل احمەتبەكوۆ ءماجىلىستىڭ جالپى وتىرىسىندا.
ول ەلىمىز تاۋەلسىزدىگىن جاريالاعان ۋاقىتتان باستاپ شەتەلدەگى وتانداستارىمىزدىڭ ەلگە ورالۋىنا بارلىق جاعداي جاسالىپ، مەملەكەتتىك دارەجەدە كومەك كورسەتىلگەنىن اتاپ ءوتتى. ساليقالى جۇرگىزىلگەن مەملەكەتتىك ساياساتتىڭ ناتيجەسىندە قازاقستانعا ءبىر ميلليوننان استام وتانداسىمىز ورالىپ، ەلىمىزدەگى دەموگرافيالىق احۋالدىڭ ەداۋىر جاقسارۋىنا اسەر ەتتى.
«دەگەنمەن، مەملەكەت تاراپىنان قانشاما قولداۋ كورسەتىلدى دەسەك تە، كوشى- قون ماسەلەسىندە شەشىمىن تاپپاي جاتقان ماسەلەلەر دە بارشىلىق. سونىڭ ءبىرى موڭعوليادان كەلگەن ورالمانداردىڭ ەڭبەك ءوتىلىنىڭ ەسەپتەلمەۋىنە قاتىستى بولىپ وتىر. ورالمانداردىڭ زەينەتاقىسى جانە الەۋمەتتىك قامسىزداندىرۋ ماسەلەلەرى قازاقستان ازاماتتارىمەن بىردەي «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭمەن رەتتەلەدى. زاڭ بويىنشا ورالماندار قازاقستان ازاماتىنىڭ بولۋىنا نە بولماۋىنا قاراماستان ەل ازاماتتارىمەن بىردەي زەينەتاقىمەن قامسىزداندىرىلۋى قۇقىعىن پايدالانادى. زاڭناماعا سايكەس، زەينەتاقىنىڭ مولشەرى ەڭبەك وتىلىنە جانە زەينەت الدى كەزەڭدە العان ورتاشا العان ايلىق تابىسىنا بايلانىستى بولادى»، - دەدى دەپۋتات.
الايدا 2014 -جىلى 8 - ساۋىردەن باستاپ قازاقستان مەن موڭعوليا اراسىندا جاسالعان الەۋمەتتىك قامسىزداندىرۋ سالاسىنداعى ىنتىماقتاستىق تۋرالى كەلىسىمنىڭ كۇشىنىڭ جويىلۋىنا بايلانىستى موڭعوليادان ورالعان قازاقتاردىڭ زەينەتاقىسى كۇرت تومەندەپ كەتكەن. ويتكەنى ورالمانداردىڭ موڭعولياداعى ەڭبەك ءوتىلى ەسەپكە الىنباي وتىر.
مىسالى، موڭعوليادا مەملەكەتتىك قىزمەتتە 46 جىل ەڭبەك ەتكەن ازامات قازىر قازاقستاندا 850 12 تەڭگە جاردەماقى الادى ەكەن. 11 مىڭ تەڭگەنى قاناعات تۇتۋعا ءماجبۇر بولىپ وتىرعان ادامدار از ەمەس.
«مەملەكەتتەر اراسىنداعى بۇل كەلىسپەۋشىلىكتەر ەڭ الدىمەن بۇقارا حالىققا سوققى بولىپ تيۋدە. ورالمانداردىڭ ەڭبەك ءوتىلىنىڭ ەسەپتەلمەۋى، ياعني قازاقستان مەن موڭعوليا اراسىندا جاسالعان كەلىسىمنىڭ كۇشىنىڭ جويىلۋى وسى ەلدەن قازاقستانعا قونىس اۋدارىپ جاتقان قانداستارىمىزدىڭ كوشىنىڭ توقتاۋىنا اكەپ سوعۋى مۇمكىن»، - دەگەن الاڭداۋشىلىعىن ءبىلدىردى احمەتبەكوۆ.
كوممۋنيستەر فراكسياسى مينيستردەن بۇل ماسەلەنى ۇكىمەت قاراۋىنا شىعارىپ، ونىڭ شەشىمىن تابۋدى سۇرادى.