استانادا اتاتۇرىكتى ەسكە الۋ شاراسى وتەدى

استانا. قازاقپارات - 10 -قاراشا كۇنى تۇركيا رەسپۋبليكاسىنىڭ نەگىزىن قالاۋشى، ۇلى كوسەم مۇستافا كەمال اتاتۇرىكتى ەسكە الۋ ماقساتىندا «اتاتۇرىك فوتوكورمەسىنىڭ» اشىلۋ ءراسىمى وتەدى، دەپ حابارلايدى «قازاقپارات» ح ا ا.

ءىس- شارانى يۋنۋس ەمرە اتىنداعى تۇرىك مادەنيەت ورتالىعى تۇركيانىڭ قازاقستانداعى ەلشىلىگىنىڭ قولداۋىمەن ۇيىمداستىرۋدا. 79 جىل بۇرىن دۇنيە سالعان اتاتۇرىكتى ەسكە الۋ شاراسى ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ باس عيماراتىندا وتەدى.

كورمەگە بۇرىن جارىققا شىقپاعان 40 تان استام سۋرەت قويىلادى.

شارانىڭ اشىلۋ سالتاناتىنا تۇركيانىڭ قازاقستانداعى ەلشىسى نيەۆزات ۋيانىك، پارلامەنت وكىلدەرى، يۋنۋس ەمرە اتىنداعى تۇرىك مادەنيەت ورتالىعىنىڭ باسشىسى الماگۇل يسينا، ونەرپازدار مەن تاعى باسقا قوناقتار قاتىسادى.

ايتا كەتەيىك، مۇستافا كەمال اتاتۇرىك - تۇركيا مەملەكەتىنىڭ رەفورماتورى، اسكەري قولباسشىسى، مەملەكەت قايراتكەرى، تۇركيا رەسپۋبليكاسىنىڭ نەگىزىن قالاۋشى جانە ونىڭ تۇڭعىش پرەزيدەنتى.