تۇركى اكادەمياسى «تۇركى الەمىندە تۇلعالار تاعىلىمى» اتتى سەمينارلار توپتاماسىن باستادى
«بۇگىن تۇركى اكادەمياسىندا تۇركى الەمىنىڭ تانىمال تۇلعالارىنا ارنالعان ارنايى سەمينارلار توپتاماسىن باستاپ وتىرمىز. العاشقى سەمينارىمىز تۇركى الەمىندەگى كورنەكتى تۇلعالاردىڭ ءبىرى، تاتار حالقىنىڭ كورنەكتى قايراتكەرى ءابدىراشيت يبراھيمگە ارنالادى. ول تۇركى حالىقتارىنىڭ اۆتومونياسى جايىندا ەڭ ءبىرىنشى بولىپ ماسەلە كوتەرىپ، جاپونيا مەن تۇركى الەمى اراسىن بايلانىستىرعان كوپىر بولا ءبىلدى دەسەك ارتىق ايتقاندىق ەمەس. مۇنان بولەك، ول قازاقستانمەن دە تىعىز بايلانىستا بولىپ، اقمولادا مۇعالىمدىك قىزمەت اتقارعان. ءتىپتى 1907 -جىلى پەتەربوردا «سەركە» جۋرنالىن العاش شىعارعان دا ەدى. سونىمەن قاتار ول تۇركى ەلدەرىنىڭ بارلىعىن ارالاپ شىققان ساياحاتشى دا»، - دەدى سەميناردىڭ اشىلۋىندا ءسوز سويلەگەن تۇركى اكادەمياسىنىڭ باسشىسى دارحان ءقىدىرالى.
ونىڭ ايتۋىنشا، الداعى ۋاقىتتا دا بۇل سەمينارلار توپتاماسى ءوز جالعاسىن تاۋىپ، ءاليحان بوكەيحانوۆ، احمەت اعا ۇلى، زاكي ءۋالي توعان سىندى بۇكىل تۇركى الەمىنە ورتاق تۇلعالارىنا ارنالاتىن بولادى.
تۇركى جۇرتىنىڭ تەگەۋىرىندى تۇلعاسى ءا. يبراھيمنىڭ تۋعانىنا 160 جىل تولۋىنا ورايلاستىرعان سەميناردا جاپونيانىڭ بەلگىلىم عالىمى، بىلىكتى تۇركىتانۋشى، پروفەسسور حيساو كوماتسۋ تۇرىك تىلىندە ءدارىس وقىدى.
«مەن ءۇشىن الدارىڭىزدا ءسوز سويلەۋ زور قۇرمەت. مەنىڭ سىزدەردىڭ الدارىڭىزدا قوزعايىن دەپ وتىرعان تاقىرىبىم «جاديتشىلدىك جانە جاپونيا» دەپ اتالادى. وزدەرىڭىز بىلەسىزدەر، ءابدىراشيت يبراھيم كوپتەگەن ماقالالار جازعان جۋرناليست، ساياحاتشى، كورنەكتى قايراتكەر. ول جاپونيادا 2 -جىل تۇرىپ، جاپون حالقىن مۇسىلماندارمەن تانىستىرۋعا تىرىسقان عالىمداردىڭ ءبىر»، - دەگەن جاپون حالقى تاتاردىڭ كورنەكتى قايراتكەرىنىڭ ومىرىنە كەڭىنەن توقتالدى. سونىمەن قاتار ول وتىرىسقا قاتىسۋشىلاردى قىزىقتىرعان ساۋالدارعا دا جان-جاقتى جاۋاپ بەردى.
سەمينار سوڭىندا دارحان قىدىرالى جاپون عالىمىنا مازمۇندى بايانداماسى ءۇشىن العىسىن ءبىلدىرىپ، «تۇركولوگيانى زەرتتەۋگە قوسقان زور ۇلەسى ءۇشىن» تۇركى اكادەمياسى حالىقارالىق ۇيىمىنىڭ قۇرمەت گراموتاسىمەن ماراپاتتادى.