دومبىراشىلار دوداسىنا ەلىمىزدىڭ 14 وڭىرىنەن 24 ونەرپاز قاتىستى، دەپ حابارلايدى قازاقپارات ءتىلشىسى. ءتول ونەرىمىزدى تورگە وزدىراعان تۇلعالاردىڭ ءبىرى - ساعىن جالمىشيەۆ اتىنداعى 1- رەسپۋبليكالىق دومبىراشىلار بايقاۋىنىڭ قوستاناي وڭىرىندە وتكىزىلۋىنىڭ وزىندىك سەبەبى بار.
«ساعىن جالمىشيەۆ قازاق كۇي ونەرىنىڭ دامۋىنا ايتارلىقاي ۇلەس قوستى. ول اسكەري سالادا عانا ەمەس، ۇلتتىق ونەردى ناسيحاتتاۋدا ءبىرقاتار ناتيجەلى جۇمىس اتقاردى. سول سەبەپتى، اردا تۇلعانى ۇلىقتاۋ ماقساتىندا وسىنداي بايقاۋ ۇيىمداستىرىپ وتىرمىز» ، - دەدى وبلىستىق مادەنيەت باسقارماسىنىڭ باسشىسى ەرلان قالماقوۆ.
كۇيشىلەر كونكۋرسىندا ايگۇل ۇلكەنبايەۆا، نازىمبەك مولداحمەتوۆ سىندى ونەر مايتالماندارى قازىلىق ەتتى. ەلىمىزدىڭ ار تۇكپىرىنەن كەلگەن كۇيشىلەردىڭ اراسىندا وسالى جوق. ەكىنشى كەزەڭگە 15 قاتىسۋشى جولداما الىپ، مىقتىنى انىقتادى. سونىمەن، دومبىراشىلار سايىسىندا ارقالىقتىق دانيار رىسبەكوۆتىڭ باعى جاندى.
«مۇنداي بايقاۋدىڭ ءبىزدىڭ ەلدە، اسىرەسە، شەت وبلىس قوستاناي جەرىندە جۇزەگە اسۋى اسا ماڭىزدى. بۇل - ءبىزدىڭ رۋحاني جاڭعىرۋىمىزدىڭ ءبىر كورىنىسى. حالىق جادىمەن جەتكەن جاۋھارلارىمىز جاستاردىڭ جادىنا قونادى. وسى ارقىلى ۇلتتىق كودىمىز ودان سايىن نىعايا تۇسەدى» ، - دەيدى دومبىراشى.
اۆتور: باتىر جولاي ۇلى