نازاربايەۆ: «نۇر وتان» حالىققا قالتقىسىز قىزمەت ەتۋدى جالعاستىرا بەرەدى دەپ سەنەمىن
بۇل تۋرالى بۇگىن «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.
«بۇگىن ءبىز ماڭىزدى ماسەلەلەردى تالقىلاۋ ءۇشىن وسى كەڭەستى جيناپ وتىرمىز. بيىل «نۇر وتان» پارتياسىنىڭ قۇرىلعانىنا 18 جىل بولادى. بۇل ادام ءومىرىنىڭ ولشەمىندەگى العاشقى كامەلەتتىك جاس بولىپ سانالاتىنىن بىلەسىزدەر. وسى ۋاقىتتىڭ ىشىندە پارتيامىز شىنىعىپ، شىڭدالىپ، ەلىمىزدەگى ەڭ ۇلكەن ساياسي كۇشكە اينالعانى بەلگىلى. قۇرىلعان كۇننەن باستاپ بارلىق ەلدىك ىستەردىڭ باسى-قاسىندا بولىپ كەلە جاتىر»، - دەدى وتىرىستى اشقان قازاقستان پرەزيدەنتى.
سونىمەن قاتار مەملەكەت باسشىسى حالقىمىزدىڭ بەرەكە-بىرلىگىنىڭ ارتۋىنا، ەلىمىزدىڭ ساياي تۇراقتىلىعىنىڭ نىعايىپ، ەكونوميكالىق رەفورمالاردى تابىستى ىسكە اسىرۋعا دا «نۇر وتان» پارتياسى بەلسەندى اتسالىسىپ كەلە جاتقانىن باسا ايتتى.
«حالىقپەن تىكەلەي جۇمىس ىستەپ، كەزەك كۇتتىرمەي شەشىلۋگە ءتيىستى ماسەلەلەردى ۇنەمى نازاردا ۇستاپ، ناعىز ەلدىك پارتيا اتاندى. وعان وتكەن سايلاۋلارداعى ەلدىڭ زور سەنىمى ايقىن دالەل. سول سايلاۋلارعا بەلسەندى قاتىسقان ءبىزدىڭ پارتيا مۇشەلەرىنىڭ ىستەگەن شارۋاسى، جەرگىلىكتى ۇيىمداردىڭ ىستەگەن شارۋاسى ناتيجەسىندە حالىقتىڭ جۇرگىزىپ وتىرعان ساياساتىمىزعا سەنىپ، ءبىرىڭعاي داۋىس بەرگەنىن كورىپ وتىرمىز. پارتيا بولاشاقتا دا ەلمەن ەتەنە بولىپ، حالىققا قالتقىسىز قىزمەت ەتۋدى جالعاستىرا بەرەدى دەپ سەنەمىن»، - دەدى نۇرسۇلتان نازاربايەۆ.
ەلباسى پارتيا الدىندا ءالى دە كوپ شارۋالار بار ەكەندىگىن اتاپ ءوتتى.
«قاجەتتى باعدارلامانىڭ بارلىعى قابىلداندى، ونى وزدەرىڭىز دە بىلەسىزدەر. دەگەنمەن قازىرگى جاعدايدا، دۇنيەدەگى عىلىمي-تەحنيكالىق دامۋدىڭ جاڭا سالاسىنا بۇكىل الەم ءتۇسىپ وتىرعان كەزدە ءبىزدىڭ العا قويعان ماقساتتارىمىز از ەمەس. سوندىقتان وسىنىڭ بارلىعىنا پارتيا باسشى بولىپ، جەرگىلىكتى جەرلەردە ساياساتتى ءتۇسىندىرۋى قاجەت»، - دەدى ق ر پرەزيدەنتى.