اتىراۋ بازارلارىندا الەۋمەتتىك ماڭىزى بار تاۋارلار تومەن باعامەن ساتىلۋدا

استانا. قازاقپارات - اتىراۋ بازارلارىندا الەۋمەتتىك ماڭىزى بار تاۋارلار تومەندەتىلگەن باعامەن ساتىلۋدا، دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.

و ك ق تاراتقان مالىمەتتەرگە قاراعاندا، ايماقتا 2017-2018 -جىلعى ماۋسىمارالىق كەزەڭدە الەۋمەتتىك ماڭىزى بار ازىق-تۇلىك ونىمدەرىن تۇراقتاندىرۋ قورىن جاساقتاۋ ءجۇرىپ جاتىر.

كوكتەمدە «اتىراۋ» ا ك ك وبلىستاعى ەكى شارۋا قوجالىعىمەن 1000 توننا كارتوپ جەتكىزۋ جونىندە فورۆاردتىق كەلىسىمشارتقا وتىرعان. جەتكىزىلىم مەرزىمى 2017 -جىلدىڭ 20 -قاراشاسىندا اياقتالادى دەپ جوسپارلانعان.

بيىل ساقتالاتىن كوكونىستەر مەن تامىر جەمىستەرىن جاڭا ەگىنگە الماستىرۋ جۇمىستارى جۇرگىزىلدى.

كوكتەمدە تاسىمالداۋشىلارعا بيىلعى ەگىنمەن اۋىستىرۋعا 30 توننا جۋا، 120 توننا كاپۋستا، 102,5 توننا ءسابىز بەرىلگەن. تۇراقتاندىرۋ قورىنا جەتكىزىلىمنىڭ جالپى مولشەرى 1252,5 توننا اۋىل شارۋاشىلىعى تاۋارلارىن قۇرايدى.

بۇگىنگە دەيىن 478,2 تونناسى جەتكىزىلدى، ونىڭ ىشىندە 30,0 توننا جۋا، 406,662 توننا كارتوپ، 42,541 توننا قىرىققابات بار. قويماعا تاۋار جەتكىزۋ جۇمىسى كۇن سايىن ءجۇرىپ جاتىر.

جوعارىدا كورسەتىلگەن مولشەرگە قوسىمشا 220 توننا پياز ساتىپ الۋ جوسپارلانعان. تۇراقتاندىرۋ قورىنداعى پياز كولەمى 250 توننا بولادى.

ءقازىر باعانى تەجەۋ بويىنشا جۇمىستار باستالدى. الەۋمەتتىك ماڭىزدى تاعامدار باعاسىنىڭ كوتەرىلۋىنە جول بەرمەۋ ءۇشىن «اتىراۋ» ا ك ك قالاداعى سۋپەرماركەتتەر مەن بازارلارداعى تاۋار ينتەرۆەنتسياسى باستالدى، ونىڭ ىشىندە: 1-سۇرىپتى تاۋىق جۇمىرتقاسىنىڭ داناسى -19 تەڭگەدەن، كارتوپتىڭ ءبىر كيلوگرامى-86 تەڭگە، پياز -80 تەڭگە.

كوكونىستەر باعاسىنا جۇرگىزىلگەن مونيتورينگكە سايكەس، قازىر ايماقتا 1 ك گ كارتوپتىڭ ورتاشا باعاسى-115 تەڭگە، ءسابىز-120 تەڭگە، پياز-90 تەڭگە، قىرىققابات-100 تەڭگە.