قىرعىزستاندىق بالالار اتامبايەۆتان قازاقستانمەن تاتۋلاسۋدى سۇرادى - ۆيدەو

استانا. قازاقپارات - بىشكەكتە وقۋشىلار تروللەيبۋستىڭ ىشىندە فلەشموب ۇيىمداستىردى.

ولار قىرعىز ۇلتتىق اسپاپتارىمەن قازاقتىڭ مۋزىكالىق كومپوزيتسيالارىن ورىندادى، دەپ حابارلايدى Baq.kz اقپارات اگەنتتىگى Sputnik قىرعىزستان- عا سىلتەمە جاساپ.

قوعامدىق كولىكتىڭ ىشىندە جۋمامۋدۋن شەراليەۆ اتىنداعى №6 بالالار ونەر مەكتەبىنىڭ وقۋشىلارى «اتا تولعاۋى» كومپوزيتسياسىن ورىنداعان.

ونەر مەكتەبىنىڭ وقىتۋشىسى تولگوناي وسمونوۆانىڭ ايتۋىنشا، بالالار بۇل كۇيدى كەزدەيسوق تاڭداماعان. ولار قىرعىزستان مەن قازاقستاننىڭ پرەزيدەنتتەرىن وسىلايشا دوستاسۋعا شاقىرعىلارى كەلگەندەرىن جەتكىزگەن.

«قىرعىز جانە قازاق حالقى ءبىرتۇتاس بولۋى كەرەك، ولار ساياسي سۇراقتارعا بايلانىستى بولىنبەۋى ءتيىس. ءبىزدىڭ مادەنيەتىمىز دە، ءداستۇرىمىز دە بىردەي. ءبىز ەكى ەلدىڭ قاشاندا دوس بولعانىن قالايمىز. بۇل فلەشموبتى «دوستاستىق» دەپ اتاۋعا بولادى»، - دەيدى وسمونوۆا.

«اتا تولعاۋى» - قازاق كومپوزيتورى نۇرعيسا تىلەنديەۆتىڭ وركەسترلىك پوەماسى. ۇلى مۋزىكانت - 500 دەن استام تاڭعاجايىپ تۋىندىنىڭ اۆتورى، قازاق ك س ر حالىق ءارتىسى، ك س ر و حالىق ءارتىسى، حالىق قاھارمانى.