ءتۇز تاعىسى اسىرەسە قاتونقاراعاي، تارباعاتاي جانە زايسان اۋداندارىندا كوبەيىپ كەتكەن. ماسەلەن، قاتونقاراعاي اۋدانى تۇرعىندارىنىڭ ايتۋىنشا، ورىستەگى مالعا قاسقىرلار ۇيىرىمەن باقتاشىنىڭ كوزىنشە شاباتىن بولعان. 150 دەن استام ءتۇتىنى بار اۋىلداعى ءاربىر ۇيدەن بۇگىنگە دەيىن 1-2 مال قاسقىرعا جەم بولعان.
ءتىپتى اۋىل تۇرعىندارى قاس قارايعان سوڭ ۇيلەرىنەن شىعۋعا دا ۇرەيلەنىپ قالعان. وبلىستىق تابيعي رەسۋرستار جانە تابيعاتتى پايدالانۋ باسقارماسىنىڭ ماماندارى قاسقىرلاردى اتۋ ءۇشىن ارنايى اۋە وتريادى جاساقتالعانىن حابارلادى.
اڭشىلار اۋەلى اۋەدەن باقىلاۋ جاساپ، ودان سوڭ قاسقىر كوپ شوعىرلانعان اۋدانداردا اتۋدى باستايدى. ءبىر جىلدىڭ ىشىندە ايماق بويىنشا 346 قاسقىر اۋلانعان.
«بۇگىننەن باستاپ تىكۇشاق بويىنشا اۋەدەن باقىلاۋ رەيدى باستالىپ كەتتى. سۋىق ءتۇسىپ، قار تۇسكەن كەزدەن قار موتاتسيكلىمەن شىعىپ، جەردەن رەيدتەر باستالادى»، - ارمان ەسەنتايەۆ، وبلىستىق تابيعي رەسۋرستار جانە تابيعاتتى پايدالانۋ باسقارماسىنىڭ ءبولىم جەتەكشىسى.