مۇسىلماندارعا ارنالعان كريپتوۆاليۋتا جاسالۋى مۇمكىن
كريپتوۆاليۋتا حالال بانكينگتىڭ قۇرالى رەتىندە قولدانىلۋ ماسەلەسى يسلام قاۋىمداستىقتارى اراسىندا تالقىلاۋدان ءوتتى. بۇل تۋرالى قازاندا عالىمدار مەن قارجىگەرلەردىڭ قاتىسۋىمەن وتكەن كونفەرەنتسيانىڭ قورىتىندىسىندا رەسەي مۋفتاتتار كەڭەسىنىڭ جەتەكشىسى مادينا كاليمۋللينا ايتتى.
«جاڭا كريپتوۆاليۋتا حالال سيپاتىندا بولۋى ءتيىس. ازىرگە شاريات ستاندارتتارى بۇل ماسەلەنى قامتىمايدى، الايدا الداعى ەكى- ءۇش جىلدىڭ ىشىندە ول جاسالۋى ابدەن مۇمكىن»، - دەدى كاليمۋللينا.
ساراپشى مامان قازىرگى كەزدە ءبىرقاتار مۇسىلمان مەملەكەتتەردە بيتكوينعا ارنالعان بيرجالاردىڭ پايدا بولعاندىعىن اتاپ ءوتتى. ماسەلەن، ءباا- دە جاسالعان BitOasis كۋۆەيت، باحرەين جانە ساۋد اراۆياسىندا قىزمەت سالاسىندا قولدانىلۋدا.
مادينا كاليمۋللينانىڭ ايتۋىنا قاراعاندا، اتالعان قارجى تەتىگىنىڭ ءبىرىڭعاي رەتتەۋشىسىنىڭ بولماۋى كريپتوۆاليۋتانى قولدانۋعا قولبايلاۋ بولىپ وتىر.
«بيتكوينعا قارسى نەگىزگى ارگۋمەنتتەردىڭ اراسىندا - تاۋەكەل دەڭگەيىنىڭ جوعارى بولۋى (مايسير) مەن بەلگىسىزدىك (گارار) جانە ناقتى اكتيۆتەر مەن مەملەكەتتىك كەپىلدەردىڭ بولماۋى جاعدايلارى بار»، - دەدى ول.