شىمكەنتتە تۇرىك فيلمدەرى تەگىن كورسەتىلىپ جاتىر - فوتو
تۇرىك فيلمدەرى اپتالىعىنىڭ سالتاناتتى اشىلۋ راسىمىنە وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ، تۇركيا مەملەكەتىنەن كەلگەن قوناقتار - ەۋرازيا ازاماتتىق قوعامدىق بىرلەستىگىنىڭ ءتوراعاسى يسمايل سافي، تۇركيا رەسپۋبليكاسىنىڭ ەڭبەك سىڭىرگەن قايراتكەرلەرى مەن رەجيسسەرلارى ەرحان بايتەمۋر، كيۋرشات كىزباز، كينواكتەرلار تۋرگاي اتالاي، اچەليا ەلماس، فۋركان پالالى قاتىستى.
تۇركيا رەسپۋبليكاسى مادەنيەت مينيسترلىگى مەن و ق و اكىمدىگىنىڭ ۇيىمداستىرۋىمەن 1-5 -قاراشا ارالىعىندا شىمكەنت قالاسىنداعى «Shymkent plaza» ويىن- ساۋىق ورتالىعىنىڭ كينو زالىندا تاريحي، دراما باعىتىنداعى فيلمدەر كۇنگەي كورەرمەندەرىنىڭ نازارىنا ۇسىنىلاتىن بولادى.
جالپى بۇل كورسەتىلىمنىڭ باستى ماقساتى تۇركى ەلدەرىنە ورتاق، مادەنيەتى مەن ادەبيەتىن ارقاۋ ەتكەن تاريحي فيلمدەردى ناسيحاتتاۋ، كينورەجيسسەرلەر مەن اكتەرلار اراسىنداعى شىعارماشىلىق بايلانىستى نىعايتۋ، تاجىريبە الماسۋعا جول اشۋ بولىپ تابىلادى.
كينو - كەز كەلگەن مەملەكەتتىڭ مادەني ايناسى ەكەنىن ايتقان وبلىس اكىمى جانسەيىت تۇيمەبايەۆ ول حالىقتىڭ تۇرمىس- سالتى مەن ءداستۇرىن دارىپتەيتىن قۇرال بولىپ سانالاتىنىن جەتكىزدى.
«بۇگىندە بۇكىل الەم كينو مەن تەلەحيكايا سالاسىنا ۇلكەن دەن قويىپ ءجۇر. ءبىزدىڭ ەلىمىزدە دە كينو سالاسىنا ءجىتى كوڭىل ءبولىنىپ، كەڭىنەن ناسيحاتتالىپ كەلەدى. سەبەبى، كينو جاي عانا ونەر ەمەس، ول قوعامنىڭ ۇلتتىق يدەولوگياسىن قالىپتاستىراتىن نەگىزگى قۇرالدىڭ ءبىرى. سوندىقتان دا، كەز - كەلگەن مەملەكەت ءوز كينويندۋسترياسىنىڭ دامۋىنا زور مۇمكىندىكتەر جاسايدى. ال كينو مەن انيماتسيا سالاسى دا وڭتۇستىك قازاقستان وبلىسىندا دا دامىپ كەلە جاتىر. كينو سالاسىندا جۇرگەن ازاماتتار ەلباسىمىزدىڭ «بولاشاققا باعدار: رۋحاني جاڭعىرۋ» ماقالاسىندا اتاپ كورسەتكەن ۇلتتىق رۋحتى ارقاۋ ەتكەن دۇنيەلەردى ءتۇسىرۋ ارقىلى وسكەلەڭ ۇرپاقتىڭ جۇرەگىندە ماقتانىش سەزىمىن وياتىپ، پاتريوتتىققا تاربيەلەۋىمىز قاجەت. وسى باعىتتى ماقسات تۇتقان وبلىسىمىزداعى جەكە كينوستۋديالاردىڭ 40 تان اسا كوركەم فيلمدەرى كورەرمەنگە جول تاراتتى»، - دەدى وبلىس اكىمى.
ەسكە سالايىق، تۇرىك فيلمدەرى اپتالىعىندا وتەتىن بارلىق كينولار اقىسىز.