قازاقستان يوردانيانى جاقىن ءارى باۋىرلاس ەل سانايدى - نۇرسۇلتان نازاربايەۆ
بۇل تۋرالى بۇگىن اقوردادا ەلىمىزگە رەسمي ساپارمەن كەلگەن يوردانيا حاشيميت كورولدىگىنىڭ كورولى ابداللا Ⅱ بەن ءال-حۋسەينمەن وتكەن كەلىسسوزدەردەن كەيىنگى بىرلەسكەن باسپا ءسوز مالىمدەمەسى بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.
«ەڭ الدىمەن يوردانيا كورولى ابداللا Ⅱ بەن ءال-حۋسەينگە مەنىڭ شاقىرۋىمدى قابىل الىپ، قازاقستانعا كەزەكتى رەسمي ساپارىمەن كەلگەنى ءۇشىن شىنايى ريزاشىلىعىمدى بىلدىرەمىن. ءبىز يوردانيانى تاياۋ شىعىستاعى، جالپى اراب الەمىندەگى ماڭىزدى رولگە يە بولىپ وتىرعان حالىقارالىق قاۋىمتاستىقتىڭ بەلدى مۇشەسى رەتىندە قاراستىرامىز. كەلەسى جىلدىڭ اقپان ايىندا ەكى ەلدىڭ اراسىنداعى ديپلوماتيالىق قارىم-قاتىناستىڭ ورناعانىنا 25 جىل تولادى. سونىڭ قارساڭىندا كەزدەسىپ وتىرعانىمىزدىڭ ءمانى وتە ۇلكەن. شيرەك عاسىردا ەلدەرىمىز ءتۇرلى سالاداعى بايلانىستارىن دامىتىپ، دوستىق جانە سەنىم قارىم- قاتىناسىن ورناتتى. بۇل كورول ابدوللا ەكىنشىنىڭ قازاقستانعا دەگەن ىستىق ىقىلاسىنىڭ ارقاسىندا جۇزەگە اسقان ۇلكەن كەلىسىمدەر دەپ اتاپ وتكىم كەلەدى»، - دەدى قازاقستان پرەزيدەنتى.
وسى رەتتە مەملەكەت باسشىسى ابداللا Ⅱ بەن ءال-حۋسەيننىڭ پاراساتتى جانە كورەگەن ساياساتىنىڭ ناتيجەسىندە يوردانيا قارۋلى قاقتىعىستار شىققان تاياۋ شىعىس وڭىرىندە تۇراقتىلىق پەن قاۋىپسىزدىك ءوازيسى مارتەبەسىن يەلەنىپ وتىرعانىن باسا ايتتى.
«ال الداعى ۋاقىتتا دا مەملەكەتارالىق قاتىناستاردىڭ بارلىق باعىتتارى بويىنشا ءوزارا ءتيىمدى ىنتىماقتاستىقتى دامىتۋعا كەلىستىك. ەڭ باستىسى قازاقستان يوردانيانى جانە ونىڭ حالقىن جاقىن ءارى باۋىرلاس ەل دەپ سانايدى. كوپتەگەن حالىقارالىق، وڭىرلىك ماسەلەلەر بويىنشا ءبىزدىڭ ۇستانىمدارىمىز ءبىر بولىپ كەلە جاتىر»، - دەدى ەلباسى.
اۆتور: مارلان جيەمباي