استانا پروتسەسىنە قاتىسۋشىلار سوچيدە سيرياارالىق كونگرەسس وتكىزۋگە ۋاعدالاستى
بۇل جايىندا بۇگىن سيريالىق قاقتىعىستى رەتتەۋ جونىندەگى استانا پروتسەسىنىڭ 7-حالىقارالىق كەزدەسۋىنە قاتىسۋشىلار ۋاعدالاستى، دەپ حابارلايدى قازاقپارات.
كەزدەسۋدىڭ قورىتىندىسىنا ارنالعان باسپا ءسوز ءماسليحاتى بارىسىندا سيريا اراب رەسپۋبليكاسىنىڭ ب ۇ ۇ جانىنداعى تۇراقتى وكىلى باشار ال-دجافاري ۇلتتىق ديالوگ كونگرەسىنىڭ سيريا مەن رەسەي اراسىنداعى ۇزاق ۋاقىتقا سوزىلعان ديالوگ پەن ۇيلەستىرۋ ءىس-قيمىلدارىنىڭ ناتيجەسى ەكەندىگىن اتاپ ءوتتى.
«مايدانداعى جاعدايدى، سونىمەن قاتار سيرياداعى لاڭكەستىك ارەكەتتەردىڭ ازايۋىن ەسكەرە وتىرىپ، ءبىز مۇنداي كونفەرەنتسيانى وتكىزەتىن قولايلى ءسات تۋىندادى دەپ شەشتىك. ارينە، ءبىز وعان قاتىسۋعا دايىنبىز. باستاپقىدا كونفەرەنتسيانى سيريادا وتكىزۋ ۇسىنىلعان ەدى. كەيىننەن وتكىزۋ ورنى رەتىندە رەسەي تاڭدالدى»، - دەدى ول.
ال ر ف پرەزيدەنتىنىڭ سيريا جونىندەگى ارناۋلى ەلشىسى الەكساندر لاۆرەنتيەۆ اتالعان سيرياارالىق ماڭىزدى كەزدەسۋدى باستاپقى كەزدە سيريانىڭ وزىندە وتكىزۋ نۇسقاسى قارالعاندىعىن راستادى.
«ءبىراق قاۋىپسىزدىكتى قاجەتتى دەڭگەيدە قامتاماسىز ەتۋگە مۇمكىندىك بەرمەيتىن ورىن العان جايتتاردى ەسكەرە كەلە، بۇل شارانى رەسەي اۋماعىندا وتكىزۋ تۋرالى شەشىم قابىلداندى. اتالعان فورۋمدى وتكىزۋگە ەڭ قولايلى نۇسقا سوچي قالاسى بولماق دەگەندى مەن تاياۋدا عانا ەستىپ ءبىلدىم. وزدەرىڭىزدە بىلەسىزدەر، اتالعان كونگرەستىڭ بارلىق قاتىسۋشىلارىنىڭ قاۋىپسىزدىك ماسەلەسىن ايتپاعاننىڭ وزىندە ول جەردە سايكەسىنشە ينفراقۇرىلىم مەن مۇمكىنشىلىك بار»، - دەدى لاۆرەنتيەۆ.