قوستاناي وبلىسىنان دالا بيلەۋشىسى جەرلەنگەن وبا تابىلدى

استانا. قازاقپارات - تورعاي وڭىرىندە قۇرىلىس ۇلگىسى بۇرىن- سوڭدى كەزدەسپەگەن وبا تابىلدى. ارحەولوگيالىق ەسكەرتكىش قوستاناي وبلىسى ارقالىق اۋدانىنا قاراستى جاڭاقالا اۋىلىنىڭ ماڭايىندا ورنالاسقان.

 مامانداردىڭ ايتۋىنشا، ەجەلگى تەمىر داۋىرىنە جاتاتىن قورىم تونالعان بولىپ شىقتى. دەگەنمەن ارحەولوگتار بىرنەشە قۇندى جادىگەر تاپقان. تورعاي -  ارحەولوگيالىق تۇرعىدان الىپ قاراعاندا ەلىمىزدە تولىق زەرتتەلمەگەن ايماقتىڭ ءبىرى. تەك سوڭعى بىرنەشە جىلدىڭ كولەمىندە عانا مۇندا قازبا جۇمىستارى بەلسەندى ءجۇرىپ جاتىر.

ماماندار اشقان سوڭعى جاڭالىقتىڭ ءبىرى -  ساق داۋىرىنە جاتاتىن وبا. مۇندا دالا بيلەۋشىسى جەرلەنگەن كورىنەدى. قورىمنىڭ ديامەترى -  32، بيىكتىگى -  3 مەتر. بۇل ولشەمدەر ادامنىڭ الەۋمەتتىك دارەجەسىنىڭ جوعارى بولعانىن ءبىلدىرىپ تۇر. سونداي- اق ءمايىت قويىلعان تۇستاعى تاس قۇرىلىستا ارحەولوگتاردىڭ نازارىن بىردەن اۋدارعان. «سەبەبى بۇل -  ەل ارحەولوگياسىندا ءجيى كەزدەسە بەرمەيتىن جاعداي» ، -  دەيدى ماماندار. اقان وڭعار، ق ر ۇلتتىق مۋزەيى «حالىق قازىناسى» ع ز ي باسشىسى:

 - ەرەكشە ءبىر دۇنيە -  ادامدى شۇڭقىرعا قويىپ، ۇستىنەن ارنايى كۇمبەز جاساعاندىعى. بۇل ازىرشە ارحەولوگيادا كەزىكپەگەن. ياعني ورتالىق قازاقستاننىڭ ارحەولوگياسىندا تىركەلمەگەن جاعداي بولىپ تۇر. وبا ماڭايىنان 152 جەبە، كونە قانجار جانە قىش قۇمىرانىڭ سىنىقتارى تابىلدى. ولاردىڭ بارلىعى جان- جاقتى زەرتتەلىپ، كەيىننەن جەرگىلىكتى مۋزەيگە تابىستالادى.

جالپى قازبا جۇمىستارىنىڭ قارقىندى جۇرۋىنە «دەشتى- قىپشاق» عىلىمي- زەرتتەۋ ورتىلىعى سۇبەلى ۇلەس قوسىپ وتىر.

ساپار ىسقاقوۆ، «دەشتى- قىپشاق» عىلىمي- زەرتتەۋ ورتالىعىنىڭ ديرەكتورى:

 - «بابالار ىزىمەن» دەگەن عىلىمي ەكسپەديتسياعا بارىپ كەلدىك. كەلەسى جىلى ول جالعاسىن تابادى. بارلىعى 40-50 ەلدە، ءبىزدىڭ بابالارىمىزدىڭ سول ەلدىڭ تاريحىندا، مادەنيەتىندە ىزدەرى قالعان. ال ەندى ەڭ ۇلكەن ىزدەر قازاقتىڭ اۋماعىندا.

بىلتىر «دەشتى- قىپشاق» ورتالىعىنىڭ قولداۋىمەن سارمات داۋىرىندە سالىنعان 2 قورعاندا زەرتتەۋ جۇمىستارى جۇرگىزىلدى. بيىل ارحەولوگتار ارقالىق ماڭىندا ەڭبەكتەنىپ ءجۇر.

 تۇبەكباي اۋباكىروۆ، قوستاناي وبلىسى ارقالىق قالاسى اكىمىنىڭ ورىنباسارى:

 - «رۋحاني جاڭعىرۋ» باعدارلاماسى «تۋعان جەر» باعىتى بويىنشا اتقارىلىپ جاتقان ەڭ كولەمدى ءىس دەپ بىلەمىن. تابىلعان ەكسپوناتتار ەرتەڭ وڭدەلىپ، ارقالىق قالاسىنداعى مۋزەيگە تابىس ەتكەلى وتىر. بۇل دا بولسا مۋزەي قورىنىڭ تولىعۋىنا ۇلكەن كومەگى بولاتىن ءىس.

تورعاي دالاسىنداعى زەرتتەۋ جۇمىستارى مۇنىمەن توقتامايدى. ارحەولوگتار: «اشىلماعان جاڭالىق ءالى كوپ»، -  دەيدى.

www.24.kz