رەلسكە باسىمەن جاتىپ، پويىز استىنا تۇسكەن سەمەيلىك امان قالدى

وقيعا 25 -قازان كۇنى ساعات تۇسكى 14:10 شاماسىندا سەمەي - ەسكى ەرتىس ستانسالارى ارالىعىندا بولعان.

«ماشينيستىڭ ايتۋىنشا، زارداپ شەككەن ادام اياق استىنان جۇگىرىپ شىعىپ، رەلسكە باسىن قويا قويعان»، - دەپ حابارلادى «جۇك تاسىمالى» ا ق- نىڭ باسپا ءسوز قىزمەتىنەن.

وسىعان قاراماستان، ەر ادام ءتىرى قالعان.

«ول جەدەل جاردەم قىزمەتىمەن سەمەي قالاسىندا جەتكىزىلدى. قازىرگى ۋاقىتتا ونىڭ كىم ەكەنى انىقتالدى. زارداپ شەككەن ادام ماس كۇيدە بولعان»، - دەلىنگەن حابارلامادا.

كومپانيادان ءمالىم ەتكەندەي، وسى كۇنى پويىز جولدارىندا تاعى ءبىر وقيعا تىركەلدى. كوكشەتاۋ- نوۆويشيمسكايا ۋچاسكەسىندە ماشينيست تەمىر جول بويىندا بوگدە ادامنىڭ جۇرگەنىن كورىپ، ساعاتىنا 75 شاقىرىممەن كەلە جاتقان پويىزدى جەدەل توقتاتۋعا ءماجبۇر بولعان. اۋا رايىنىڭ جايسىزدىعىنان كورۋ مۇمكىندىگى از بولعاندىقتان، اپاتتىڭ الدىن الۋ مۇمكىن بولمادى. سالدارىنان قاۋىپسىزدىك ەرەجەلەرىن ساقتاماي، تەمىر جولدىڭ ۇستىمەن قوي ايداپ بارا جاتقان قويشى زارداپ شەككەن. اتالعان وقيعانىڭ ءمان-جايى انىقتالۋ ۇستىندە.

«جۇك تاسىمالى» ا ق باسپا ءسوز قىزمەتىنىڭ حابارلاۋىنشا، 2017 -جىلدىڭ 9 ايىنىڭ ىشىندە قازاقستاندا پويىزدىڭ ادام قاعۋىنا قاتىستى - 83، مالعا قاتىستى 10 نان استام وقيعا تىركەلدى.