قازان ايىنىڭ 25- كۇنى وزبەكستان پرەزيدەنتى شاۆكات ميرزيەيەۆتىڭ تۇركياعا رەسمي ءىس- ساپارى باستالدى. بۇل وزبەكستان باسشىسىنىڭ اراعا 20 جىل سالىپ تۇركياعا العاش كەلۋى.
رەجەپ تايىپ ەردوعان شاۆكات ميرزيەيەۆتى ءوزىنىڭ انكاراداعى رەزيدەنسياسىندا جەكە قابىلداپ: «بۇل وزبەكستان باسشىسىنىڭ اراعا 20 جىل سالىپ انكاراعا العاش رەت ات باسىن بۇرۋى. ءبىز ءۇشىن بۇل وتە ماڭىزدى كەزدەسۋ. بۇگىن ءبىز 22 قۇجاتقا قول قويدىق. ەرتەڭ تاعى ءتورت قۇجاتقا قول قوياتىن بولامىز. قازىرگى ۋاقىتتا ەكى ەل اراسىنداعى تاۋار اينالىمى 1,2 ميلليارد دوللاردى قۇرايدى. ءبىراق بۇل ءبىز قالاعان دەڭگەيدەن الدە قايدا تومەن كورسەتكىش. ءبىز بارلىق سالادا وزبەكستاننىڭ مىقتى مەملەكەت بولعانىن قالايمىز» - دەگەن.
ال ءوز كەزەگىندە شاۆكات ميرزيەيەۆ: «20 جىلدىق ۇزىلىستەن كەيىن ءبىز ءبىر- ءبىرىمىزدى ساعىنىپ قالىپپىز. قازىر ءبىز ءبىر- ءبىرىمىزدى ەشقانداي ءسوزسىز اق ءتۇسىنىپ وتىرمىز. ەكى باۋىرلاس ەل اراسىندا ۆيزا ماسەلەسى بولماۋى ءتيىس. بۇل ماسەلەنى جوسپار بويىنشا شەشەتىن بولامىز» - دەپ مالىمدەگەن.
بۇدان بولەك بۇگىن قوس ەلدىڭ پرەزيدەنتتەرى ستامبۇل قالاسىندا جالپى قۇنى 3,5 ميلليارد دوللاردى قۇرايتىن قۇجاتتارعا قول قوياتىن بولادى. شاۆكات ميرزيەيەۆتىڭ تۇركياعا رەسمي ساپارى قازان ايىنىڭ 27- كۇنى اياقتالادى دەپ كۇتىلۋدە.
ەسداۋلەت قىزىربەك ۇلى
http://qazaqtimes.com