وڭتۇستىك قازاقستان وبلىسىندا ءدىني ەكسترەميزم مەن تەرروريزم ماسەلەلەرى تالقىلاندى

 شىمكەنت. قازاقپارات - وڭتۇستىك قازاقستاندا وبلىس پروكۋرورى جانە وبلىس اكىمىنىڭ ءتوراعالىق ەتۋىمەن زاڭدىلىقتى، قۇقىقتىق ءتارتىپ پەن قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ جانە تەرروريزمگە قارسى كۇرەس كوميسسياسىنىڭ بىرلەسكەن ءماجىلىسى ءوتتى.

جيىنعا وبلىستىق، اۋداندىق جانە قالالىق دەڭگەيدەگى قۇقىق قورعاۋ جانە مەملەكەتتىك ورگانداردىڭ ءبىرىنشى باسشىلارى قاتىستى، دەپ حابارلايدى قازاقپارات ءتىلشىسى. ۇيلەستىرۋ كەڭەسىنىڭ وتىرىسىندا ءدىني ەكسترەميزم مەن تەرروريزمگە قارسى ۋاكىلەتتى ورگاندار تاراپىنان قولدانىلعان ءىس- قيمىل شارالارىنىڭ تيىمدىلىگىنە جۇرگىزىلگەن تالداۋ ناتيجەلەرى تالقىلاندى.

 جيىنعا قاتىسقاندار ءداستۇرلى ەمەس ءدىني اعىمداردىڭ قىزمەتىنە توسقاۋىل قويىپ، تابىنۋشىلاردىڭ بەتبۇرىسىن ءداستۇرلى دىنگە وتكىزۋ جايىن تالقىلادى. ءدىني احۋالدى جاقسارتۋ تەتىكتەرىن قاراپ، پروكۋراتۋرامەن ازىرلەنگەن قۇزىرلى ورگانداردىڭ ءوزارا ارەكەت ەتۋ الگوريتمدەرى نازارعا ۇسىنىلدى. سونىمەن قاتار، پروكۋراتۋرانىڭ باستاماسى نەگىزىندە وبلىستاعى ەتنوسارالىق جاعدايدى تۇراقتاندىرۋ مەن ۇلتارالىق قاقتىعىستاردىڭ الدىن الۋ جانە بولدىرماۋ ماسەلەسى دە ءسوز بولدى. اتالعان باعىتتاردا وڭىردەگى پروبلەمالىق ماسەلەلەرگە نازار اۋدارىلىپ، ولاردى شەشۋ جولدارى بويىنشا پروكۋراتۋرا تاراپىنان وبلىس اكىمىنە بىرنەشە ۇسىنىستار بەرىلدى. ونىڭ نەگىزىندە، جەرگىلىكتى اتقارۋشى ورگانداردا ارنايى قۇرىلىمدار قۇرۋ، نەعۇرلىم ءقاۋىپ بايقالاتىن وڭىرلەردە تەولوگتاردى كوبەيتىپ، تۇراقتى جۇمىسىن ۇيىمداستىرۋ قاجەتتىگى ايتىلدى.

جەكەلەگەن قالا، اۋدان پروكۋراتۋرالارىندا مەكەمەارالىق ورتالىقتار قۇرۋ قاراستىرىلدى. قاتىسۋشىلار تاراپىنان دا ءبىرقاتار ۇسىنىستار بەرىلدى. وبلىس اكىمى تاراپىنان ۇسىنىستار قولداۋ تاۋىپ، وزىمەن مەتوديكالىق- ادىستەمەلىك قۇرالداردى دايىنداۋ ماقساتىندا جۇمىسشى توپتار قۇرۋ ۇسىنىلدى. ءماجىلىس قورىتىندىسىمەن قۇقىق قورعاۋ جانە مەملەكەتتىك ورگان باسشىلارىنا ناقتى تاپسىرمالار بەلگىلەنىپ، ۇيىمداستىرۋشىلىق تۇرعىدا ءبىرقاتار شەشىمدەر قابىلداندى.

 اۆتور: اينۇر اقبايەۆا